లక్నో: ”వారంలో 7 రోజులు ఉన్నాయి. ఇందులో 3 రోజులు మొదటి భార్యతో కాపురం చేయాలి.
తర్వాతి 3 రోజులు 2వ భార్యతో కాపురం చేయాలి. మిగిలిన ఒక రోజులో ఇష్ట ప్రకారంగా ఇద్దరిలో ఎవరితోనైనా ఉండవచ్చు” అని 2 పెళ్లిళ్లు చేసుకున్న వ్యక్తికి ఒక పంచాయితీ తీర్పు ఇచ్చింది. ఈ విచిత్ర సంఘటన వెనుక ఉన్న నేపథ్యాన్ని ఇక్కడ చూద్దాం.
ఉత్తరప్రదేశ్ రాష్ట్రం రాంపూర్ జిల్లా తాడియాల్ గ్రామానికి చెందిన వ్యక్తి మహమ్మద్ నిసాకత్. ఇతను 2 పెళ్లిళ్లు చేసుకున్నాడు. ఇతనికి గత 14 ఏళ్ల క్రితం ఉత్తరాఖండ్కు చెందిన అష్రా అనే మహిళతో వివాహమైంది. ఈ దంపతులకు ఇద్దరు కుమార్తెలు ఉన్నారు.
మొదటి భార్య అష్రాకు మగపిల్లలు లేరు.
దీన్ని కారణం చూపి మహమ్మద్ నిసాకత్ గత 4 ఏళ్ల క్రితం 2వ పెళ్లి చేసుకున్నాడు. 2వ భార్య పేరు నేహా. నేహాకు కూడా ఇద్దరు ఆడపిల్లలే పుట్టారు. మగపిల్లలు పుట్టలేదు. అయినప్పటికీ ప్రస్తుతం మహమ్మద్ నిసాకత్ తన 2వ భార్య నేహా కుటుంబంతో కలిసి నివసిస్తున్నాడు.
మహమ్మద్ నిసాకత్ తన మొదటి భార్యను, ఆమెకు పుట్టిన ఇద్దరు కుమార్తెలను పట్టించుకోలేదు. ఇంటి ఖర్చులకు కూడా డబ్బులు ఇవ్వలేదు. దీంతో మొదటి భార్య అష్రా కష్టాలను ఎదుర్కొంది. దీనికి సంబంధించి మహమ్మద్ నిసాకత్కు, ఆమెకు మధ్య తరచూ గొడవలు జరుగుతుండేవి. ఈ నేపథ్యంలో నిన్న మొన్న అష్రా, తాడియాల్ అవుట్పోస్ట్ పోలీసులకు ఫిర్యాదు చేసింది.
ఫిర్యాదులో, ”నా భర్త మహమ్మద్ నిసాకత్ నన్ను, నా ఇద్దరు కుమార్తెలను వదిలేశాడు. ఖర్చులకు కూడా డబ్బులు ఇవ్వడం లేదు. 2వ భార్య కుటుంబంతో కలిసి నివసిస్తున్నాడు. అతనిపై చర్యలు తీసుకోవాలి” అని పేర్కొంది. ఈ ఫిర్యాదు ఆధారంగా పోలీసులు విచారణ ప్రారంభించారు.
ఈలోగా ఈ వ్యవహారాన్ని ఊరి పంచాయితీకి తీసుకెళ్లారు. మహమ్మద్ నిసాకత్, మొదటి భార్య అష్రా, 2వ భార్య నేహాలను పిలిపించి పంచాయితీ నిర్వహించారు. మొత్తం 4 గంటల పాటు చర్చలు జరిగాయి. అందులో ఒప్పందం కుదిరింది. దాని ప్రకారం మహమ్మద్ నిసాకత్ ఇద్దరు భార్యలతోనూ కలిసి జీవించాలి. ఎవరినీ వదిలేయకూడదని తీర్పు ఇచ్చారు.
అంతేకాకుండా వారంలో 3 రోజులు మొదటి భార్యతోనూ, తర్వాతి 3 రోజులు 2వ భార్యతోనూ మహమ్మద్ నిసాకత్ జీవించాలి. మిగిలిన ఒక రోజులో మహమ్మద్ నిసాకత్ తన ఇష్టం వచ్చినట్లు ఉండవచ్చు. అంతేకాక వారానికి రూ. 500 చొప్పున నెలకు రూ. 2 వేలను మొదటి భార్య ఇంటి ఖర్చుల కోసం అందించాలని తీర్పు ఇచ్చారు.
ఈ తీర్పును మొదటి భార్య అష్రా, 2వ భార్య నేహా మరియు మహమ్మద్ నిసాకత్లు అంగీకరించారు. దీంతో మొదటి భార్య అష్రా పోలీసులకు ఇచ్చిన ఫిర్యాదును వెనక్కి తీసుకుంది. తమ సమస్యను పంచాయితీలో మాట్లాడుకుని పరిష్కరించుకున్నామని, భర్తపై చర్యలు తీసుకోవాల్సిన అవసరం లేదని చెబుతూ ఫిర్యాదును ఉపసంహరించుకుంది.