భార్యాభర్తల బంధం నమ్మకంపై ఆధారపడి ఉంటుందని అంటారు. అయితే, తమ జీవితానికి సంబంధించిన ఏ విషయాలను భాగస్వామితో పంచుకోవాలో, వేటిని దాచాలో అనేది వ్యక్తిగత నిర్ణయం. మధ్యప్రదేశ్కు చెందిన ఒక యువతి తన జీవితంలోని ఒక చేదు నిజాన్ని తన భర్తకు చెప్పడం ఆమె వివాహ బంధానికే ముగింపు పలికింది.
విషయం తెలుసుకున్న వెంటనే భర్త తన భార్యను వదిలేయడంతో వారి వివాహం రద్దయింది. వీరి విడాకుల కేసు గత మూడేళ్లుగా కోర్టులో నలుగుతోంది. భార్యను తిరిగి ఇంటికి తీసుకెళ్లాలని పలుమార్లు ప్రయత్నించినా, భర్త అందుకు అంగీకరించలేదు. చివరకు మూడేళ్ల తర్వాత వారి వివాహం రద్దు (Annulment) అయింది. అసలు ఆ నిజం ఏమిటో ఇప్పుడు తెలుసుకుందాం.
ఈ ఘటన మధ్యప్రదేశ్లోని గ్వాలియర్లో చోటుచేసుకుంది. 25 ఏళ్ల యువకుడు, అదే నగరానికి చెందిన 21 ఏళ్ల యువతిని కుటుంబ సభ్యుల సమక్షంలో వివాహం చేసుకున్నాడు. పెళ్లి తర్వాత వారిద్దరికీ అది మొదటి రాత్రి (సుహాగ్రాత్). ఇద్దరూ తమ జీవితంలోని కొన్ని విషయాలను ఒకరితో ఒకరు పంచుకుంటున్నారు. అదే సమయంలో, తన జీవితంలోని ఒక చేదు నిజాన్ని భర్తకు చెప్పాలని భార్య భావించింది.
భార్య చెప్పిన ఆ నిజం ఏమిటి? పెళ్లికి ముందే తనపై అత్యాచారం జరిగిందని, ఆ పని తన సొంత మేనమామ కొడుకే చేశాడని భార్య తన భర్తకు చెప్పింది. ఈ మాట వినగానే భర్త నివ్వెరపోయాడు. ఆగ్రహంతో వెంటనే గదిలోంచి బయటకు వచ్చేశాడు. ఆ రాత్రే తన కుటుంబ సభ్యులకు ఈ విషయం చెప్పి, మరుసటి రోజే ఆమెను పుట్టింటికి పంపించేశాడు. ఈ విషయంలో అతని కుటుంబ సభ్యులు కూడా అతనికి మద్దతుగా నిలిచారు. ఎన్నిసార్లు ప్రయత్నించినా ఆమెను తిరిగి అత్తారింటికి తీసుకెళ్లేందుకు భర్త ససేమిరా అన్నాడు.
కోర్టుకు చేరిన వివాదం.. భర్త ఫ్యామిలీ కోర్టులో విడాకుల కోసం దరఖాస్తు చేసుకున్నాడు. మరోవైపు, ఆ యువతి తనపై అత్యాచారం చేసిన మేనమామ కొడుకుపై కేసు నమోదు చేసింది. అయినప్పటికీ, ఆమెను ఉంచుకోవడానికి భర్త అస్సలు ఇష్టపడలేదు. అమ్మాయి తరపు బంధువులు ఎంత నచ్చజెప్పినా, అతను వివాహ బంధాన్ని తెంచుకోవాలనే నిర్ణయానికే కట్టుబడ్డాడు.
అత్యాచారానికి గురైన యువతిని తిరిగి ఇంటికి తెచ్చుకోవడానికి అబ్బాయి తరపు వారు కూడా సుముఖంగా లేరు. అందుకే వారు తమ కొడుకు తీసుకున్న నిర్ణయానికే మద్దతు ఇచ్చారు. కోర్టు పలుమార్లు యువతిని వివరణ ఇవ్వాలని పిలిచినా, ఆమె హాజరుకాలేదు. చివరకు, కోర్టు వారి వివాహాన్ని రద్దు చేస్తున్నట్లు (శూన్యం అని) ప్రకటించింది.