స్టార్టప్ ప్రపంచంలో నమ్మకం అనేది చాలా ముఖ్యమైనది. కానీ ఆ నమ్మకమే మొదటి వారంలోనే వమ్ము అయితే? ఢిల్లీకి చెందిన ‘గల్లీ ల్యాబ్స్’ (Gully Labs) అనే స్నీకర్స్ డిజైన్ హౌస్‌కు సరిగ్గా ఇలాంటి చేదు అనుభవమే ఎదురైంది.
ఏం జరిగింది? కంపెనీ కో-ఫౌండర్ అర్జున్ సింగ్ ‘X’ (ట్విట్టర్) వేదికగా ఈ విషయాన్ని పంచుకున్నారు. కొన్ని నెలల క్రితం వారు కస్టమర్ సపోర్ట్ (CS) విభాగంలో ఒక ప్రొఫెషనల్‌ను నియమించుకున్నారు. అయితే, ఉద్యోగంలో చేరిన మొదటి వారంలోనే ఆ ఉద్యోగి కంపెనీ సిస్టమ్‌లో 100% డిస్కౌంట్ ఇచ్చేలా కొన్ని కూపన్ కోడ్‌లను సృష్టించాడు. ఆ కోడ్‌లను ఉపయోగించి తన స్నేహితులు, కుటుంబ సభ్యుల పేర్ల మీద సుమారు ₹2 లక్షల విలువైన షూస్‌ను ఆర్డర్ చేసేశాడు. అంటే కంపెనీ ఉత్పత్తులు ఉచితంగా బయటకు వెళ్లిపోయాయి. ఆర్డర్లు అందిన కొద్ది రోజులకే అతను ఉద్యోగం మానేశాడు.
రివర్స్ అటాక్: కంపెనీకి ఈ మోసం గురించి తెలిసి అతడిని నిలదీయగా, మొదట సహకరిస్తానని చెప్పి కొన్ని షూస్‌ను తిరిగి ఇచ్చాడు. కానీ సగానికి పైగా షూస్ అప్పటికే వాడేయడం వల్ల పనికిరాకుండా పోయాయి. మిగిలిన వాటికి డబ్బులు చెల్లించాలని కంపెనీ కోరగా, ఆ మాజీ ఉద్యోగి ఏకంగా కంపెనీకే లీగల్ నోటీసులు పంపాడు. తనను వేధిస్తున్నారంటూ (Harassment) ఎదురు ఆరోపణలు చేయడం గమనార్హం.
ఈ ఘటనతో మేల్కొన్న ‘గల్లీ ల్యాబ్స్’ ఇప్పుడు తమ అంతర్గత వ్యవస్థలను, డిస్కౌంట్ కోడ్ యాక్సెస్‌ను మరింత కఠినతరం చేసింది.