ఫోన్ దొంగతనం – భద్రత: మీ మొబైల్ ఫోన్ పోయినప్పుడు లేదా దొంగిలించబడినప్పుడు, మీ బ్యాంక్ అకౌంట్ మరియు UPI వివరాలను రక్షించుకోవడానికి వెంటనే ఏం చేయాలో ఈ కథనంలో తెలుసుకుందాం.
నేడు మనందరి ఫోన్లలో బ్యాంక్ అకౌంట్లు, వ్యక్తిగత ఫోటోలు, సోషల్ మీడియా అకౌంట్లు వంటి ఎన్నో ముఖ్యమైన సమాచారం ఉంటుంది. ఫోన్ పోయినప్పుడు కొత్త ఫోన్ కొనాలనే బాధ కంటే, మన బ్యాంక్ అకౌంట్, UPI లేదా డేటాను ఎవరైనా దుర్వినియోగం చేస్తారేమోననే భయం ఎక్కువగా ఉంటుంది. ఆందోళనలో గంటల కొద్దీ సమయం వృథా చేయకుండా, వెంటనే చేయాల్సిన 5 ముఖ్యమైన పనులు ఇక్కడ ఉన్నాయి:
- సిమ్ కార్డ్ బ్లాక్ చేయండి: ఫోన్ పోయిన వెంటనే మీరు చేయాల్సిన మొదటి పని, మీ టెలికాం ఆపరేటర్ (Jio, Airtel, Vi, BSNL) కస్టమర్ కేర్కు కాల్ చేసి, మీ సిమ్ కార్డును వెంటనే బ్లాక్ చేయమని చెప్పడం. దొంగ మీ ఫోన్ లాక్ తీయలేకపోయినా, సిమ్ తీసి వేరే ఫోన్లో వేసి బ్యాంక్ OTPల ద్వారా డబ్బులు కొట్టేయగలడు. సిమ్ బ్లాక్ చేస్తే వాడు ఏమీ చేయలేడు.
- బ్యాంక్ మరియు UPI సేవలను ఆపండి: సిమ్ బ్లాక్ చేసిన వెంటనే, మీ బ్యాంకుకు సమాచారం ఇవ్వండి. కస్టమర్ కేర్ నంబర్కు కాల్ చేసి మీ నెట్ బ్యాంకింగ్, మొబైల్ బ్యాంకింగ్ మరియు UPI సేవలను తాత్కాలికంగా ఆపమని చెప్పండి. అలాగే గూగుల్ పే (GPay), ఫోన్ పే (PhonePe) లేదా పేటిఎం (Paytm) కస్టమర్ సపోర్ట్కు కాల్ చేసి మీ వాలెట్ మరియు UPI ఐడిని బ్లాక్ చేయండి.
- CEIR పోర్టల్లో ఫోన్ను బ్లాక్ చేయండి: భారత ప్రభుత్వం ‘CEIR’ (Central Equipment Identity Register) అనే పోర్టల్ను అందుబాటులోకి తెచ్చింది. మీరు ఈ వెబ్సైట్లోకి వెళ్లి మీ ఫోన్ యొక్క IMEI నంబర్ను ఇచ్చి దాన్ని బ్లాక్ చేయవచ్చు. ఇలా చేస్తే ఆ ఫోన్లో మరే ఇతర సిమ్ కార్డ్ కూడా పనిచేయదు. ఆ ఫోన్ కేవలం ఒక డబ్బా లాగా మారిపోతుంది. అంతేకాకుండా, దొంగ ఫోన్ ఆన్ చేస్తే పోలీసులకు దాని లొకేషన్ వెంటనే తెలిసిపోతుంది.
- డేటాను డిలీట్ చేయండి (Find My Device): మీ వద్ద వేరే ఫోన్ లేదా ల్యాప్టాప్ ఉంటే, వెంటనే మీ గూగుల్ అకౌంట్ (ఆండ్రాయిడ్ వినియోగదారులకు) లేదా ఐక్లౌడ్ (ఐఫోన్ వినియోగదారులకు) లాగిన్ అవ్వండి. అక్కడ ‘Find My Device’ లేదా ‘Find My’ అనే ఆప్షన్ ఉంటుంది. దీని ద్వారా మీ ఫోన్లో ఉన్న ఫోటోలు, పాస్వర్డ్లు మరియు వ్యక్తిగత సమాచారాన్ని మీరు ఉన్న చోటు నుండే పూర్తిగా డిలీట్ చేయవచ్చు.
- పోలీసులకు ఫిర్యాదు చేయండి: చివరగా, అతి ముఖ్యమైన పని పోలీసులకు ఫిర్యాదు చేయడం. దీని కోసం పోలీస్ స్టేషన్కు వెళ్లనవసరం లేదు, ఆన్లైన్లోనే ‘లాస్ట్ ప్రాపర్టీ’ (Lost Property) ఫిర్యాదును నమోదు చేయవచ్చు. ఈ FIR లేదా NC కాపీని భద్రంగా ఉంచుకోండి. భవిష్యత్తులో మీ ఫోన్ను ఉపయోగించి ఎవరైనా చట్టవిరుద్ధమైన పనులు చేస్తే, ఈ పోలీస్ రిపోర్ట్ మిమ్మల్ని కాపాడుతుంది. కొత్త సిమ్ కార్డ్ తీసుకోవడానికి కూడా ఇది అవసరమవుతుంది.