ఇద్దరు భారతీయ యువతులు చాట్‌జిపిటిని ఉపయోగించిన తర్వాత ఆత్మహత్యకు పాల్పడ్డారనే నివేదికలపై టెస్లా సీఈఓ ఎలోన్ మస్క్ ఆందోళన వ్యక్తం చేశారు. చిన్ననాటి స్నేహితులైన ఆ ఇద్దరు యువతులు మార్చి 7న ఆలయ వాష్‌రూమ్‌లో శవమై కనిపించారు. వారి మృతదేహాల వద్ద అనస్థీషియా ఇంజెక్షన్లు మరియు సిరంజీలను పోలీసులు స్వాధీనం చేసుకున్నారు.
ఈ విషయాన్ని పోడ్‌కాస్టర్ కేటీ మిల్లర్ సోషల్ మీడియాలో షేర్ చేయగా, ప్రపంచ కుబేరుడు మస్క్ ఆ పోస్ట్‌కు “Yikes” (దిగ్భ్రాంతిని లేదా అసహ్యాన్ని వ్యక్తం చేసే పదం) అని స్పందించారు.
ఏం జరిగింది? (సూరత్ విషాదం)
సూరత్‌కు చెందిన 18 ఏళ్ల రోష్నీ శరద్ శిర్సాత్ మరియు 20 ఏళ్ల జ్యోత్స్న అతుల్ చౌదరి చిన్నప్పటి నుండి స్నేహితులు. మార్చి 6న ఉదయం కాలేజీకి వెళ్తున్నామని చెప్పి ఇంటి నుండి బయటకు వచ్చిన వీరు తిరిగి రాలేదు.
ఆలయంలో గుర్తింపు: దిండోలి ప్రాంతంలోని స్వామినారాయణ ఆలయ వాష్‌రూమ్‌లోకి వీరు వెళ్లినట్లు సిసిటివి ఫుటేజీలో తేలింది. లోపలి నుండి గడియ పెట్టి ఉండటంతో తలుపులు పగలగొట్టి చూడగా, వారు అపస్మారక స్థితిలో పడి ఉన్నారు. ఆస్పత్రికి తరలించేలోపే వారు మరణించారు.
సాంకేతిక ఆధారాలు: పోలీసులు వారి మొబైల్ ఫోన్లను పరిశీలించగా, వారు చాట్‌జిపిటిలో “చనిపోవడం ఎలా?”, “ఆత్మహత్య ఎలా చేసుకోవాలి?”, “ఏ మందులు వాడాలి?” వంటి అంశాలను సెర్చ్ చేసినట్లు తేలింది.
ఏఐ (AI) దుర్వినియోగంపై హెచ్చరిక
పోడ్‌కాస్టర్ కేటీ మిల్లర్ ఈ ఘటనపై స్పందిస్తూ.. కుటుంబ సభ్యులు తమ పిల్లలు ఏఐ టూల్స్‌తో ఏం మాట్లాడుతున్నారో గమనించాలని కోరారు. “చాట్‌జిపిటి వంటి వాటిని మీ ప్రియమైన వారు వాడకుండా చూసుకోండి” అని ఆమె హెచ్చరించారు.
ప్రస్తుతం ఎలోన్ మస్క్ చాట్‌జిపిటిని రూపొందించిన ఓపెన్ ఏఐ (OpenAI) సంస్థపై చట్టపరమైన పోరాటం చేస్తున్నారు. లాభాపేక్ష లేకుండా పనిచేయాల్సిన సంస్థ, ఇప్పుడు కేవలం డబ్బు కోసమే పనిచేస్తోందని ఆయన ఆరోపిస్తున్నారు. ఈ నేపథ్యంలో ఈ ఘటన ప్రాధాన్యత సంతరించుకుంది.