మొదట రణవీర్ సింగ్ (Ranveer Singh), ఇప్పుడు అక్షయ్ ఖన్నా (Akshay Khanna)! ఇటీవలి ‘ధురంధర్’ (Dhurandhar) సినిమా విజయం ఈ నటుల ఆలోచనా విధానాన్ని మార్చేసిందా? ఇప్పటికే ‘డాన్ 3’ నుండి రణవీర్ తప్పుకోగా, ఇప్పుడు అక్షయ్ ఖన్నా కూడా అదే బాటలో పయనిస్తున్నట్లు సమాచారం. ఆయన ‘దృశ్యం 3’ ప్రాజెక్ట్ నుండి తప్పుకున్నారని టాక్ వినిపిస్తోంది. దీనికి ప్రధానంగా రెండు కారణాలు వినిపిస్తున్నాయి: ఒకటి స్క్రిప్ట్ నచ్చకపోవడం, రెండు రెమ్యునరేషన్ భారీగా పెంచడం.
రెమ్యునరేషన్ గొడవ: ‘దృశ్యం’ మొదటి రెండు భాగాల్లో అక్షయ్ ఖన్నా కీలక పాత్రలో కనిపించారు. అయితే ‘దృశ్యం 3’ కోసం ఆయన డిమాండ్ చేసిన పారితోషికం సినిమా బడ్జెట్‌కు ఏమాత్రం పొంతన లేకుండా ఉందని తెలుస్తోంది. ‘ధురంధర్’ సినిమాలో ‘రెహమాన్ డాకైట్’ పాత్రలో అక్షయ్ నటనకు ప్రేక్షకుల నుండి ప్రశంసలు వెల్లువెత్తాయి. బాలీవుడ్‌లో ఆయన సెకండ్ ఇన్నింగ్స్ అద్భుతంగా ప్రారంభమైందని అభిమానులు అంటున్నారు. ఈ క్రేజ్‌ను దృష్టిలో పెట్టుకుని, గత రెండు సీజన్ల కంటే చాలా రెట్లు ఎక్కువ రెమ్యునరేషన్ అక్షయ్ అడిగారని, అది ఇవ్వడం నిర్మాతలకు అసాధ్యంగా మారిందని సమాచారం.
స్క్రిప్ట్‌పై అసంతృప్తి: పారితోషికంతో పాటు, అక్షయ్ ఖన్నాకు సినిమా స్క్రిప్ట్ కూడా పెద్దగా నచ్చలేదని తెలుస్తోంది. తన పాత్ర ప్రాధాన్యతను పెంచాలని, కథలో పలు మార్పులు చేయాలని ఆయన కోరినట్లు సమాచారం. చాలా కాలం పాటు కెరీర్ పరంగా ఒడిదుడుకులు ఎదుర్కొన్న అక్షయ్, ఈ ఏడాది వరుసగా రెండు హిట్లు అందుకోవడంతో సినిమాల ఎంపికలో చాలా జాగ్రత్తగా వ్యవహరిస్తున్నారు. 2026లో విడుదల కావాల్సిన ‘దృశ్యం 3’ నుండి అక్షయ్ తప్పుకోవడంతో, ఇప్పుడు ఆ పాత్రలో ఎవరు నటిస్తారనేది ఆసక్తికరంగా మారింది.
రణవీర్ సింగ్ – డాన్ 3 వివాదం
అక్షయ్ కంటే ఒక్క రోజు ముందే రణవీర్ సింగ్ ‘డాన్ 3’ నుండి తప్పుకున్నట్లు వార్తలు వచ్చాయి. దీనికి కూడా ప్రధాన కారణం ‘ధురంధర్’ విజయమే అని తెలుస్తోంది. ఆ సినిమా హిట్ అయ్యాక రణవీర్ తన బడ్జెట్‌ను భారీగా పెంచారని, అంత మొత్తం వెచ్చించడం నిర్మాత ఫర్హాన్ అక్తర్‌కు సాధ్యం కాకపోవడంతో రణవీర్ ఈ ప్రాజెక్ట్ నుండి తప్పుకున్నట్లు బాలీవుడ్ వర్గాల సమాచారం.