తమిళగ వెట్రి కజగం (TVK) అధ్యక్షుడు విజయ్, తన రాజకీయ కార్యకలాపాల కోసం అవసరమైన నిధుల కోసం ఆస్తులను విక్రయిస్తున్నారనే వార్త ఇప్పుడు రాజకీయ మరియు సినీ వర్గాల్లో హాట్ టాపిక్ అయింది.
చెన్నైలోని అన్నా నగర్ వెస్ట్, తిరుమంగళం ప్రాంతంలో విజయ్‌కు ఉన్న ఒక కమర్షియల్ కాంప్లెక్స్‌ను, ఆయన సుమారు 34 కోట్ల 65 లక్షల రూపాయలకు ఒక ప్రైవేట్ టీవీ ఛానెల్ యజమానికి విక్రయించినట్లు తెలుస్తోంది. సదరు సంస్థ ఆ స్థలంలో ఒక పాఠశాలను (School) నిర్మించాలని ప్లాన్ చేస్తున్నట్లు సమాచారం.
ఇటీవల వేలూరులో జరిగిన పార్టీ కార్యకర్తల సమావేశంలో “తమిళనాడులోని ప్రతి గ్రామానికి వస్తాను” అని విజయ్ ప్రకటించారు. దీనికి సంబంధించి త్వరలో జరగబోయే భారీ ప్రచార సభలు మరియు పార్టీ కార్యక్రమాల కోసం భారీగా నిధులు అవసరమవుతున్నాయి.
మిగిలిన రాజకీయ పార్టీల మాదిరిగా విరాళాలు సేకరించకుండా, ఇప్పటివరకు తన సొంత డబ్బుతోనే పార్టీ కార్యక్రమాలను నిర్వహిస్తున్న విజయ్‌కు, ప్రస్తుతం నిధుల కొరత ఏర్పడటంతోనే తన ప్రధాన ఆస్తులను విక్రయించాలని నిర్ణయించుకున్నట్లు వార్తలు వస్తున్నాయి.