న్యూ ఢిల్లీ: ట్రాన్స్‌జెండర్ల హక్కులు మరియు భద్రతకు సంబంధించిన బిల్లు బుధవారం రాజ్యసభలో మూజువాణి ఓటుతో ఆమోదం పొందింది. మంగళవారమే ఈ బిల్లు లోక్‌సభలో ఆమోదం పొందగా, ఇప్పుడు రాష్ట్రపతి ఆమోదం తర్వాత ఇది చట్టరూపం దాల్చనుంది.
బిల్లుపై జరిగిన చర్చకు కేంద్ర సామాజిక న్యాయం మరియు సాధికారత మంత్రి వీరేంద్ర కుమార్ సమాధానమిస్తూ.. ఈ చట్టం ద్వారా ట్రాన్స్‌జెండర్ల హక్కులు, గౌరవం పూర్తిగా సురక్షితంగా ఉంటాయని, వారికి చట్టబద్ధమైన గుర్తింపు లభిస్తుందని తెలిపారు.
కఠిన శిక్షలు – కీలక మార్పులు
విపక్షాల ప్రశ్నలకు సమాధానంగా మంత్రి మాట్లాడుతూ.. ట్రాన్స్‌జెండర్ల హక్కులకు భంగం కలిగించే వారికి ఇకపై గరిష్టంగా 14 ఏళ్ల జైలు శిక్ష విధించేలా నిబంధనలు మార్చినట్లు చెప్పారు. 2019 చట్టంలో ఇటువంటి నేరాలకు కేవలం రెండేళ్ల గరిష్ట శిక్ష మాత్రమే ఉండేది.
ముఖ్యమైన మార్పులు ఇవే:
- శిక్షలు: నేరం యొక్క తీవ్రతను బట్టి జైలు శిక్షను 14 ఏళ్లకు పెంచారు.
- జరిమానా: గరిష్ట జరిమానాను రూ. 5 లక్షలకు పెంచారు.
- నిర్వచనం: ‘ట్రాన్స్‌జెండర్’ అనే పదం యొక్క నిర్వచనాన్ని సవరించారు. ఇందులో జీవసంబంధమైన, శారీరక లక్షణాలు లేదా విశిష్ట సామాజిక-సాంస్కృతిక గుర్తింపు (కిన్నెర, హిజ్రా వంటివి) కలిగిన వ్యక్తులను చేర్చారు.
- గుర్తింపు కార్డు: తమను తాము ట్రాన్స్‌జెండర్లుగా ప్రకటించుకునే హక్కును పరిమితం చేస్తూ, ఇకపై మెడికల్ బోర్డు నుండి సర్టిఫికేట్ పొందడాన్ని ప్రభుత్వం తప్పనిసరి చేసింది.
విపక్షాల అభ్యంతరం
చర్చా సమయంలో విపక్ష సభ్యులు ఈ బిల్లుపై అభ్యంతరం వ్యక్తం చేశారు. తమ గుర్తింపును నిరూపించుకోవడానికి ట్రాన్స్‌జెండర్లు జిల్లా కలెక్టర్ మరియు మెడికల్ బోర్డుల చుట్టూ తిరగాల్సి రావడం వారి గౌరవానికి భంగం కలిగించడమేనని విమర్శించారు. ఈ బిల్లును పార్లమెంటరీ స్టాండింగ్ కమిటీకి పంపాలని డిమాండ్ చేసినప్పటికీ, ప్రభుత్వం దానిని తోసిపుచ్చి బిల్లును ఆమోదింపజేసింది.