బీహార్‌లోని సహర్సాలో ఇటుక బట్టీ యజమాని ఒక మహిళా కార్మికురాలిపై కాల్పులు జరిపారు. బుల్లెట్ ఆమె తొడ భాగంలో తగలడంతో తీవ్ర రక్తస్రావమై ఆమె అక్కడికక్కడే కుప్పకూలిపోయింది. వెంటనే ఆమెను ఆసుపత్రికి తరలించగా, ప్రస్తుతం చికిత్స అందుతోంది.
యజమాని గదికి వెళ్లడానికి నిరాకరించినందుకే ఆమెపై కాల్పులు జరిపినట్లు ఆరోపణలు వస్తున్నాయి. అసోం నుండి వచ్చిన వలస కార్మికులు మాట్లాడుతూ.. యజమాని ప్రతిరోజూ రాత్రి వేళ తమ భార్యలను లేదా కుమార్తెలను తన గదికి పంపాలని ఒత్తిడి చేస్తాడని, నిరాకరిస్తే దాడులకు పాల్పడుతాడని ఆవేదన వ్యక్తం చేశారు. ఫిర్యాదు అందిన వెంటనే పోలీసులు బట్టీపై దాడి చేసి నిందితుడిని అదుపులోకి తీసుకున్నారు.
రాత్రి 2 గంటలకు పిలుపు: బాధిత కార్మికులు అసోంకు చెందిన వారు. వీరు హటియాగాఛీలోని ఒక ఇటుక బట్టీలో పని చేస్తూ అక్కడే నివసిస్తున్నారు. ఆదివారం అర్ధరాత్రి 2 గంటల సమయంలో బట్టీ యజమాని ఔవేష్ కర్నీ అలియాస్ చున్నా వీరి గది వద్దకు వచ్చి, భార్యను లేదా కూతురిని తన గదికి పంపాలని వేధించాడు. ఈ క్రమంలో కార్మికుడి కుమార్తెతో అసభ్యంగా ప్రవర్తించడమే కాకుండా, అడ్డుకున్నందుకు ఆ కార్మికుడి భార్యపై కాల్పులు జరిపాడు.
జేసీబీకి కట్టేసి కొడతానని బెదిరింపులు: “ఇది కేవలం నిన్న రాత్రి జరిగిన విషయం మాత్రమే కాదు. యజమాని ప్రతిరోజూ అర్ధరాత్రి ఎవరో ఒక కార్మికుడిని లేపి, వారి ఇంట్లోని మహిళలను పంపమని అడుగుతాడు. మాట వినకపోతే జేసీబీకి కట్టేసి కొడతానని బెదిరిస్తాడు. కొన్ని నెలల క్రితం మా బాబాయ్‌ని అలాగే కొట్టాడు, దాంతో ఆయన భయపడి ఇక్కడి నుండి పారిపోయారు” అని ఒక కార్మికుడు వాపోయాడు.
పోలీసుల చర్య: కాల్పుల ఘటనపై సమాచారం అందిన వెంటనే పోలీసులు ఇటుక బట్టీపై మెరుపు దాడి చేశారు. అక్కడ పని చేస్తున్న పలువురు బాలికలను రక్షించినట్లు సహర్సా డీఎస్పీ ఓం ప్రకాష్ తెలిపారు. మహిళా కార్మికురాలికి చికిత్స అందిస్తున్నామని, నిందితుడిని అదుపులోకి తీసుకుని విచారిస్తున్నామని ఆయన పేర్కొన్నారు.