మహారాష్ట్ర ఛత్రపతి శంభాజీనగర్ ప్రభుత్వ ఇంజనీరింగ్ కళాశాల రిటైర్డ్ హెచ్‌ఓడీ (HOD) కొందరు యువకులతో స్నేహం చేశారు. రియాలిటీ షోల పేరుతో ఆ యువకులు చూపిన రంగుల లోకంలో ఆయన ₹50 లక్షలు పెట్టుబడి పెట్టారు. ఈ లావాదేవీల వల్ల వచ్చిన గొడవలతో, ఒక ఫామ్ హౌస్ పార్టీలో ఆ ప్రొఫెసర్‌ను ఆ యువకులు కాల్చి చంపిన దిగ్భ్రాంతికరమైన ఘటన వెలుగులోకి వచ్చింది.
క్రైమ్ బ్రాంచ్ పోలీసులు ఈ కేసును ఛేదించి ముగ్గురిని అరెస్ట్ చేశారు. మృతుడి పేరు రాజభావు సుభరావ్ లోంధే (60). నిందితులు విశాల్ వికాస్ రాథోడ్ (24), ఆకాష్ వినోద్ పవార్ (32), కరణ్ విలాస్ ఆడే (22) అని పోలీస్ కమిషనర్ ప్రవీణ్ పవార్ ఆదివారం విలేకరుల సమావేశంలో వెల్లడించారు.
తప్పుల ఇంగ్లీష్ స్టేటస్‌తో చిక్కారు: హత్య చేసిన తర్వాత ఫిబ్రవరి 8న నిందితులు లోంధే మొబైల్‌ను పూణేకు తీసుకెళ్లారు. అక్కడ మొబైల్ ఆన్ చేసి, ఎవరికీ అనుమానం రాకుండా ఉండాలని వాట్సాప్‌లో “I am in personal work, don’t call anyone” అని స్టేటస్ పెట్టారు. అయితే, ప్రొఫెసర్ లోంధే ఇంగ్లీష్ ప్రొఫెసర్ కావడంతో, ఆయన అంతటి వ్యక్తి ఇంతటి తప్పుల ఇంగ్లీష్ (Broken English) వాడరని పోలీసులకు అనుమానం వచ్చింది. ఆ చిన్న క్లూతోనే పోలీసులు నిందితులను వేటాడి పట్టుకున్నారు.
హత్యకు కారణం: నిందితులు ‘లవ్ అండ్ డేర్’ అనే రియాలిటీ షో ప్రారంభిస్తామని లోంధే నుండి ₹50 లక్షలు వసూలు చేశారు. కానీ షో ప్రారంభం కాకపోవడంతో లోంధే తన డబ్బులు తిరిగి ఇవ్వాలని ఒత్తిడి చేయడం మొదలుపెట్టారు. దీంతో ఆయన్ని వదిలించుకోవాలని నిందితులు ప్లాన్ వేశారు. ఫిబ్రవరి 5న పార్టీ పేరుతో ఫామ్ హౌస్‌కు తీసుకెళ్లి, ఆయన సొంత పిస్టల్‌తోనే తల మీద కాల్చి చంపారు. అనంతరం మృతదేహాన్ని జేసీబీతో ఒక గొయ్యి తీసి పూడ్చిపెట్టారు.