న్యూఢిల్లీ: అంతర్జాతీయ క్రికెట్‌లో తన బుల్లెట్ వేగంతో బ్యాటర్ల గుండెల్లో వణుకు పుట్టించిన ఆస్ట్రేలియా దిగ్గజ బౌలర్ బ్రెట్ లీకి అరుదైన గౌరవం దక్కింది. క్రికెట్ నుండి రిటైర్ అయిన 13 ఏళ్ల తర్వాత ఆయనకు ‘ఆస్ట్రేలియన్ క్రికెట్ హాల్ ఆఫ్ ఫేమ్’లో చోటు కల్పించారు.
1999 నుండి 2012 వరకు బ్యాటర్లను భయపెట్టిన ఆయన అద్భుతమైన కెరీర్‌కు గుర్తింపుగా ఈ గౌరవం లభించింది. క్రికెట్ ఆస్ట్రేలియా ఆదివారం ఒక ప్రకటన విడుదల చేస్తూ ఈ వార్తను ధృవీకరించింది.
బ్రెట్ లీ కెరీర్ హైలైట్స్: బ్రెట్ లీ తన కెరీర్‌లో 76 టెస్టుల్లో 310 వికెట్లు, 221 వన్డేల్లో 380 వికెట్లు సాధించారు. వీటితో పాటు 25 అంతర్జాతీయ టీ20 మ్యాచ్‌లు ఆడి 28 వికెట్లు తీశారు. బిగ్ బాష్ లీగ్ (BBL) ప్రారంభ సంవత్సరాల్లో సిక్సర్స్ జట్టు తరపున ఆయన అద్భుత ప్రదర్శన చేశారు. వ్యక్తిగత రికార్డులే కాకుండా, 49 ఏళ్ల బ్రెట్ లీ పలు యాషెస్ సిరీస్ విజయాల్లో భాగమయ్యారు. అంతేకాకుండా, 1999, 2003 మరియు 2007 వన్డే వరల్డ్ కప్ గెలిచిన ఆస్ట్రేలియా జట్లలో ఆయన సభ్యుడిగా ఉన్నారు. 2008లో ఆయన ‘అలన్ బోర్డర్ మెడల్’ గెలుచుకోగా, 2006లో ‘విస్డెన్ క్రికెటర్ ఆఫ్ ది ఇయర్’గా నిలిచారు.
అంతర్జాతీయ గుర్తింపు: బ్రెట్ లీకి భారత్‌లో కూడా భారీ సంఖ్యలో అభిమానులు ఉన్నారు. ఆయనకు ‘సిక్స్ అండ్ అవుట్’ అనే విజయవంతమైన మ్యూజిక్ బ్యాండ్ కూడా ఉంది. ఆస్ట్రేలియన్ క్రికెట్ హాల్ ఆఫ్ ఫేమ్ ఛైర్మన్ పీటర్ కింగ్ మాట్లాడుతూ.. “బ్రెట్ లీ ఈ గౌరవానికి పూర్తిగా అర్హులు. ఆయన ప్రపంచంలోనే అత్యంత వేగవంతమైన బౌలర్లలో ఒకరిగానే కాకుండా, ఆస్ట్రేలియా క్రికెట్‌కు అత్యుత్తమ బ్రాండ్ అంబాసిడర్‌గా నిలిచారు” అని కొనియాడారు.
ఆస్ట్రేలియన్ క్రికెట్ హాల్ ఆఫ్ ఫేమ్‌లో ఇప్పటివరకు చోటు దక్కించుకున్న దిగ్గజాల జాబితాలో సర్ డొనాల్డ్ బ్రాడ్‌మన్, షేన్ వార్న్, రికీ పాంటింగ్ వంటి ప్రముఖుల సరసన ఇప్పుడు బ్రెట్ లీ కూడా చేరారు.