చెన్నై: విజయ్ టీవీలో ప్రసారమవుతున్న పాపులర్ సీరియల్ ‘చిన్న మరుమగళ్’ హీరోయిన్ శ్వేత చుట్టూ ఇప్పుడు ఒక పెద్ద వివాదం ముసురుకుంది. ప్రేమ, పెళ్లి, మోసం అనే కోణాల్లో సాగుతున్న ఈ వ్యవహారం రోజురోజుకూ కొత్త మలుపులు తిరుగుతోంది. తాజాగా ఆమె కన్నీరు మున్నీరవుతూ విడుదల చేసిన వీడియో సోషల్ మీడియాలో వైరల్ గా మారింది.
సీరియల్ కథే నిజ జీవితంలోనూ..
సీరియల్లో భర్త కుటుంబం వల్ల మోసపోయి రోడ్డున పడే పాత్రలో శ్వేత నటిస్తోంది. అయితే ఆమె నిజ జీవితం కూడా అంతకంటే భయంకరంగా ఉండటం షాక్కు గురిచేస్తోంది. కొద్దిరోజుల క్రితం ‘ఆది’ అనే వ్యక్తి తాను శ్వేత భర్తనని ప్రకటించడంతో ఈ రచ్చ మొదలైంది. అయితే శ్వేత దీనిని తీవ్రంగా ఖండించింది. అతను ఒక మోసగాడని, ఎవరూ అతడిని నమ్మవద్దని హెచ్చరించింది.
ఈ వివాదంలోకి మరో నటి తామరై సెల్వి కూడా ఎంట్రీ ఇచ్చింది. ఆది తన దగ్గర మూడు సవర్ల నగలు తీసుకుని మోసం చేశాడని ఆమె ఆరోపించింది. దీంతో ఈ వివాదం తమిళ బుల్లితెరపై హాట్ టాపిక్ గా మారింది.
కన్నీళ్లతో శ్వేత బయటపెట్టిన నిజాలు:
తాజాగా శ్వేత తన ఇన్స్టాగ్రామ్ పేజీలో మనసు విరిగిపోయిన స్థితిలో ఒక వీడియో పోస్ట్ చేసింది. అందులో ఆమె చెప్పిన విషయాలు హృదయాన్ని కలిచివేస్తున్నాయి:
- కుటుంబాన్ని వదిలేసి: “నేను 21 ఏళ్ల వయసులో అతడిని ప్రేమించాను. అతని కోసం నా కుటుంబాన్ని కూడా వదిలేశాను. నేను చేసిన అతిపెద్ద తప్పు అదే. మొదట్లో ఉండటానికి చోటు లేక వీధుల్లో తిరిగాము. ఒకే బట్టలను రోజుల తరబడి వేసుకున్నాను.”
- చట్టబద్ధమైన పెళ్లి కాదు: “పెళ్లయిందని చెప్పుకుంటున్నా.. అది సరైన పద్ధతిలో జరగలేదు. రిజిస్టర్ మ్యారేజ్ కూడా లేదు. నేను ఒక్కదాన్నే కష్టపడి సంపాదించి ఇల్లు కొని జీవితాన్ని నిర్మించుకున్నాను. కానీ అతను ఏమీ చేయలేదు. నా కష్టార్జితాన్ని మాత్రం అనుభవించాడు.”
- మోసగాడు: “అతను నాకంటే ముందు చాలా మందిని మోసం చేశాడని తెలిసాక నేను ఆ బంధం నుండి బయటకు వచ్చేశాను. ఇకనైనా ఎవరినీ ఇలా మోసం చేయకు” అంటూ కన్నీళ్లతో వేడుకుంది.
మారిన సమీకరణాలు
తొలుత తామరై సెల్వి.. “నేను శ్వేత కోసమే ఆదిని నా ఇంట్లోకి రానిచ్చాను, కానీ ఇప్పుడు శ్వేత నాతో మాట్లాడటం లేదు” అని అసహనం వ్యక్తం చేసింది. అయితే శ్వేత వీడియో విడుదల చేయగానే తామరై దానికి ‘లైక్’ కొట్టింది. దీనిని బట్టి వీరిద్దరూ మళ్లీ ఒక్కటయ్యారని, ఆదికి వ్యతిరేకంగా పోరాడుతున్నారని అర్థమవుతోంది.