రాజస్థాన్ రాష్ట్రం ఉదయ్‌పూర్ జిల్లా వినియోగదారుల న్యాయస్థానం (కన్స్యూమర్ కోర్టు), కస్టమర్ ఏటీఎం లావాదేవీ ఫిర్యాదుపై నిర్లక్ష్యంగా వ్యవహరించిన స్టేట్ బ్యాంక్ ఆఫ్ ఇండియా (SBI)కు రూ.9,000 రీఫండ్‌తో పాటు జరిమానా విధించి సంచలన తీర్పునిచ్చింది.
ఏటీఎంలో రూ.10,000 తీసుకునేందుకు ప్రయత్నించగా కేవలం రూ.1,000 మాత్రమే వచ్చాయని, కానీ ఖాతాలోంచి మాత్రం మొత్తం డబ్బులు కట్ అయ్యాయని ఓ కస్టమర్ వేసిన కేసులో ఈ తీర్పు వెలువడింది.
గత 2017వ సంవత్సరంలో తన భార్య వైద్య ఖర్చుల కోసం ఏటీఎంలో డబ్బులు డ్రా చేసేందుకు వెళ్లిన ఆ కస్టమర్, ఈ తప్పుడు లావాదేవీ జరిగిన 3 గంటల్లోనే ఎస్‌బీఐ బ్యాంకుకు ఆన్‌లైన్‌లో మరియు నేరుగా ఫిర్యాదు చేశాడు.
కానీ ఎస్‌బీఐ బ్యాంక్ యాజమాన్యం, ఇది ఏటీఎం సర్వీస్ కంపెనీ తప్పు అని చెప్పి బాధ్యత నుంచి తప్పించుకోవడంతో పాటు, కస్టమర్ డబ్బులు తిరిగి ఇవ్వకుండా కాలయాపన చేస్తూ వచ్చింది.
ఈ కేసును విచారించిన వినియోగదారుల కోర్టు, కస్టమర్‌కు ఎస్‌బీఐ బ్యాంకులోనే ఖాతా ఉంది కాబట్టి, ఎలాంటి సమస్య వచ్చినా అతను తన బ్యాంకును మాత్రమే ఆశ్రయిస్తాడని ఎత్తిచూపింది.
ఏటీఎం కంపెనీని సాకుగా చూపి బ్యాంక్ తన బాధ్యత నుంచి తప్పించుకోలేదని, కస్టమర్ డబ్బును రికవరీ చేసి ఇచ్చేందుకు తగిన చర్యలు తీసుకోకపోవడం ఎస్‌బీఐ బ్యాంక్ సేవాలోపమేనని కోర్టు తీవ్రంగా తప్పుబట్టింది.
దీని ఆధారంగా, కస్టమర్‌కు కట్ అయిన మిగతా మొత్తం రూ.9,000లను వెంటనే తిరిగి చెల్లించాలని, నిర్లక్ష్యంగా వ్యవహరించినందుకు రూ.7,000 పరిహారం మరియు కేసు ఖర్చులను ఎస్‌బీఐ చెల్లించాలని ఆదేశించింది.
ఏటీఎంలో డబ్బులు రాకుండా ఖాతాలో కట్ అయితే ఆయా బ్యాంకులదే పూర్తి బాధ్యత అని ఈ తీర్పు మరోసారి స్పష్టం చేసింది.
Leave a Reply