తమిళనాడు మాజీ ముఖ్యమంత్రి, దివంగత నేత జయలలితకు సంబంధించి హైదరాబాద్‌లోని నివాసాన్ని గ్రేటర్ హైదరాబాద్ మున్సిపల్ కార్పొరేషన్ (GHMC) అధికారులు సోమవారం సీల్ చేశారు. ఆస్తి పన్ను బకాయిల కారణంగానే ఈ చర్య తీసుకున్నట్లు వెల్లడించారు.
2016లో జయలలిత మరణించిన తర్వాత, ఆమెకు చెందిన రూ. 900 కోట్లకు పైగా విలువైన ఆస్తుల విషయంలో సుదీర్ఘ చట్టపరమైన పోరాటం జరిగింది. 2020లో చెన్నై హైకోర్టు జయలలిత అన్న కుమార్తె జె.దీప, కుమారుడు జె.దీపక్‌లను ఆమె వారసులుగా ప్రకటించింది. దీనితో పోయెస్ గార్డెన్‌లోని ‘వేదా నిలయం’ సహా పలు వ్యక్తిగత ఆస్తులు వీరి వశమయ్యాయి.
రూ. 20 కోట్లకు పైగా పన్ను బాకీ: జయలలిత చెల్లించాల్సిన ఆదాయపు పన్ను మరియు ఆస్తి పన్ను బకాయిలు వడ్డీతో కలిపి సుమారు రూ. 20 కోట్లకు పైగా ఉన్నట్లు తెలుస్తోంది. ఈ పన్ను చెల్లించకపోతే పోయెస్ గార్డెన్ నివాసాన్ని వేలం వేస్తామని ఆదాయపు పన్ను శాఖ ఇప్పటికే (ఫిబ్రవరి 2026లో) చెన్నై హైకోర్టుకు తెలిపింది. తమిళనాడులోని ఆస్తుల పరిస్థితే ఇలా ఉంటే, ఇతర రాష్ట్రాల్లోని ఆమె ఆస్తుల నిర్వహణ మరింత అధ్వాన్నంగా ఉంది.
హైదరాబాద్‌లోని 5 అంతస్తుల భవనం: హైదరాబాద్, యూసుఫ్‌గూడ జీహెచ్‌ఎంసీ సర్కిల్ పరిధిలోని శ్రీనగర్ కాలనీలో జయలలిత పేరు మీద ఐదు అంతస్తుల (G+4) భవనం ఉంది. ఈ భవనానికి 2017 నుండి ఆస్తి పన్ను చెల్లించలేదని అధికారులు గుర్తించారు.
నివాసానికి సీల్: దీనిపై ఫిబ్రవరి నెలలో డిప్యూటీ కమిషనర్ సురేష్ నోటీసులు పంపినప్పటికీ, వారసుల నుండి ఎటువంటి స్పందన రాలేదు. దీంతో సోమవారం (మార్చి 30) జీహెచ్‌ఎంసీ రెవెన్యూ అధికారులు ఆ భవనానికి సీల్ వేశారు.
బకాయి ఎంత?: ప్రస్తుతం అమలులో ఉన్న ‘వన్ టైమ్ సెటిల్మెంట్’ (OTS) పథకం కింద (మార్చి 31 వరకు అవకాశం ఉంది), వడ్డీ మినహాయింపులు పోను మొత్తం రూ. 82,91,822 పన్ను బకాయి ఉన్నట్లు అధికారులు తేల్చారు. గతంలో ఇక్కడ ప్రైవేట్ కార్యాలయం ఉండటం వల్ల కమర్షియల్ పన్ను విధించారు. అయితే, 2017 నుండి ఇది నివాసంగానే ఉందని, పన్ను తగ్గించాలని జయలలిత వారసుడు దీపక్ గతంలో కోరారు. అయినప్పటికీ, పన్ను చెల్లించకపోవడంతో అధికారులు ఈ కఠిన చర్య తీసుకున్నారు.