తమిళనాడు: నేటి ఉరుకుల పరుగుల జీవితంలో అంతా సాఫ్ట్‌వేర్ కొలువులు, కార్పొరేట్ వ్యాపారాల వెంట పడుతుంటే.. ఒక వ్యక్తి మాత్రం ఆ ధోరణిని మార్చారు. సాగును భారంగా కాకుండా ఒక లాభదాయకమైన వ్యాపారంగా మార్చి చూపించారు. కార్పొరేట్ ఆఫీసులోని ఏసీ గదిని వదిలి, మట్టిలోకి దిగిన ఆ రైతు.. ఇప్పుడు ఏటా లక్షల రూపాయల ఆదాయం ఆర్జిస్తూ దేశానికే ఆదర్శంగా నిలిచారు. ఆయనే తమిళనాడులోని తిరుచ్చికి చెందిన ఆదర్శ రైతు ఆర్. నరసింహన్.
కోట్లాది మందికి స్ఫూర్తినిచ్చే నరసింహన్ సక్సెస్ స్టోరీ ఇవే:
- కార్పొరేట్ ఉద్యోగానికి గుడ్ బై: 1998లో నరసింహన్ తన కార్పొరేట్ ఉద్యోగాన్ని వదిలేసి వ్యవసాయం వైపు అడుగులు వేశారు. మొదట విశ్రాంత జీవితం ప్రశాంతంగా గడపాలని భావించినా.. ఆయనలోని పట్టుదల దానిని ఒక భారీ ఆర్గానిక్ అగ్రి-ఫారెస్ట్రీ ప్రాజెక్టుగా మార్చింది. ప్రస్తుతం ఆయనకు 158 ఎకరాల పొలం ఉండగా, దాని ద్వారా ఏటా రూ. 40 నుంచి 50 లక్షల వరకు స్థిర ఆదాయం పొందుతున్నారు.
- మూడంచెల సాగు విధానం – ఒకే నేలపై మూడు లాభాలు: నరసింహన్ తన పొలాన్ని మూడు స్థాయిలలో విభజించి సాగు చేస్తున్నారు.
- మొదటి స్థాయి: టేకు, రక్త చందనం, సిల్వర్ ఓక్ వంటి దీర్ఘకాలిక చెట్లు. ఇవి భవిష్యత్తులో కోట్ల రూపాయల లాభాలను తెచ్చిపెడతాయి.
- రెండవ స్థాయి: మామిడి, అరటి, పుచ్చకాయ వంటి వార్షిక పంటలు. వీటి ద్వారా ఏటా భారీ ఆదాయం వస్తుంది.
- మూడవ స్థాయి: మినుము, పెసర వంటి పప్పు దినుసులు. ఇవి నెలవారీ ఖర్చుల కోసం ఆదాయాన్ని అందిస్తాయి. ఈ వినూత్న మోడల్ వల్ల కేవలం కలప చెట్ల నుంచే ఆయనకు ఏటా రూ. 10 నుంచి 15 లక్షల లాభం అందుతోంది.
- ఆర్గానిక్ బాటలో సక్సెస్: 2008 నుంచి ఆయన తన పొలాన్ని పూర్తిగా సేంద్రీయ సాగుగా మార్చేశారు. తన దగ్గర ఉన్న 16 దేశీ ఆవుల పేడతోనే ఎరువులు తయారు చేస్తూ.. బిందు సేద్యం (Drip Irrigation) మరియు సోలార్ ఎనర్జీని వాడుతూ పెట్టుబడి ఖర్చులను తగ్గించుకున్నారు.
- రికార్డు స్థాయిలో పుచ్చకాయ – లిమ్కా బుక్ రికార్డ్: 2010లో ఆయన పొలంలో ఏకంగా 35.75 కిలోల బరువున్న పుచ్చకాయ పండింది. ఇది అప్పట్లో దేశవ్యాప్తంగా సంచలనం సృష్టించింది. దీనిని ఆయన ఒక వేలంలో రూ. 5,000లకు విక్రయించారు.
- ప్రభుత్వ గుర్తింపు – పురస్కారాల పంట: నరసింహన్ చేసిన ఈ వినూత్న ప్రయోగాలకు నీతి ఆయోగ్ సహా పలు జాతీయ స్థాయి సంస్థల నుంచి 60కి పైగా అవార్డులు లభించాయి.
కేవలం సాగు చేయడమే కాదు, పక్కా ప్రణాళికతో దానికి సాంకేతికతను జోడిస్తే వ్యవసాయం కూడా ఏ కార్పొరేట్ ఉద్యోగానికి తీసిపోదని నరసింహన్ నిరూపిస్తున్నారు.