“రైలా లేక బారా? TTE ఏం చేశారో తెలుసా?”: కుటుంబం ముందే బాహాటంగా మద్యం తాగిన ప్రయాణికులు.. తీవ్ర ఆగ్రహం వ్యక్తం చేసిన కుటుంబ పెద్ద.!!

ఇటీవల రైలులో తన కుటుంబంతో కలిసి ప్రయాణిస్తున్న ఒక వ్యక్తికి తీవ్ర ఇబ్బందికర, అవమానకర పరిస్థితి ఎదురైంది.

ఆయన ప్రయాణిస్తున్న బోగీలోనే ఉన్న కొందరు ప్రయాణికులు బాహాటంగా మద్యం సేవించడమే ఇందుకు కారణమైంది. దీనిని చూసి దిగ్భ్రాంతికి గురైన ఆ వ్యక్తి, తోటి ప్రయాణికుల ఈ అసభ్యకర ప్రవర్తనను తీవ్రంగా ఖండిస్తూ నేరుగా వారితో వాగ్వాదానికి దిగారు. కుటుంబంతో కలిసి ప్రయాణిస్తున్నప్పుడు ఇలాంటి పనులు తీవ్ర ఇబ్బందిని కలిగిస్తాయని, తాము కూర్చోవడానికి కూడా చాలా అసౌకర్యంగా ఉందని ఆయన తన అసహనాన్ని వ్యక్తం చేశారు.

ఈ ఘటనకు సంబంధించిన వీడియో నెట్టింట విడుదలై వేగంగా వైరల్ అవుతోంది. ఆ వ్యక్తి రైల్వే అధికారులకు ఫిర్యాదు చేయడమే కాకుండా, తాము కుటుంబంతో ప్రయాణిస్తున్నందున తక్షణమే తమ సీట్లను వేరే బోగీకి మార్చాలని కోరారు. రైల్వే చట్టం సెక్షన్ 145 ప్రకారం రైళ్లలో మద్యం సేవించడం చట్టరీత్యా నేరం అయినప్పటికీ.. అక్కడ విధుల్లో ఉన్న టిక్కెట్ చెకింగ్ అధికారి (TTE) గానీ, రైల్వే రక్షణ దళం (RPF) సిబ్బంది గానీ సరైన సమయంలో తక్షణ చర్యలేవీ తీసుకోలేదని సదరు ప్రయాణికుడు ఆరోపించారు.

ఈ వీడియో ‘ఎక్స్’ (ట్విట్టర్) సహా పలు సోషల్ మీడియా ప్లాట్‌ఫామ్‌లలో వైరల్ కావడంతో నెటిజన్లు తీవ్ర ఆగ్రహం వ్యక్తం చేస్తున్నారు. పబ్లిక్ ప్రదేశాల్లో, ముఖ్యంగా రైళ్లలో ఇలా మద్యం సేవించేవారిపై కఠిన చట్టపరమైన చర్యలు తీసుకోవాలని నెటిజన్లు డిమాండ్ చేస్తున్నారు. ప్రయాణికుల భద్రత, ప్రశాంతతను కాపాడాల్సిన రైల్వే సిబ్బంది నిర్లక్ష్యంగా వ్యవహరించారని పలువురు సోషల్ మీడియా వేదికగా తమ ఆవేదనను వెళ్లగక్కుతున్నారు.