తమిళనాడు: తంజావూరు జిల్లా పేరావూరణి సమీపంలోని పిన్నవాసల్ గ్రామానికి చెందిన ఒక యువతికి అర్ధరాత్రి హఠాత్తుగా ఆరోగ్యం క్షీణించింది. ప్రాణాపాయ స్థితిలో ఉన్న ఆమెను బంధువులు బైక్‌పై ఆసుపత్రికి తీసుకువెళుతుండగా, మార్గమధ్యంలో రైల్వే గేటు మూసివేసి ఉంది. ఆ సమయంలో జరిగిన ఘటనే ఇప్పుడు ఇంటర్నెట్‌లో వైరల్‌గా మారింది.
ఘటన వివరాలు: జనవరి 3వ తేదీ రాత్రి 7:45 గంటలకు, రామేశ్వరం – తాంబరం ఎక్స్‌ప్రెస్ రైలు వెళ్లాల్సి ఉండటంతో, పిన్నవాసల్ – సిద్ధాత్తిక్కాడు రైల్వే గేట్ కీపర్ అరుళ్ జ్ఞాన డెల్ఫిన్ (29) గేటును మూసివేసింది. అదే సమయంలో అనారోగ్యంతో ఉన్న మహిళను తీసుకువచ్చిన బంధువులు, గేటు తీయమని ఆమెను వేడుకున్నారు.
నిబద్ధత మరియు మానవత్వం: అప్పుడు అరుళ్ జ్ఞాన డెల్ఫిన్ స్పందిస్తూ.. “రైలు ఇప్పటికే ఆయింగుడి దాటి వచ్చేసింది, ఇప్పుడు గేటు తీయడం అసాధ్యం” అని ఖచ్చితంగా చెప్పింది. బంధువులు “ఒక ప్రాణం పోతోంది తల్లీ.. సాయం చేయి” అని ప్రాధేయపడగా, ఆ యువతి అద్భుతమైన సమాధానం ఇచ్చింది: “ఒక ప్రాణం కోసం నేను గేటు తీయలేను, ఎందుకంటే ఆ రైలులో నన్ను నమ్ముకుని వందలాది ప్రాణాలు ఉన్నాయి. కానీ, గేటు అవతలి వైపు నా బైక్ ఉంది, దాని తాళాలు తీసుకోండి.. ఆ బైక్‌పై ఆవిడను ఆసుపత్రికి తీసుకెళ్లండి” అని చెప్పింది.
వెంటనే బంధువులు ఆ మహిళను ఎత్తుకుని పట్టాలు దాటించి, ఆ లోపు అక్కడకు వచ్చిన మరొకరి బైక్ సాయంతో ఆసుపత్రికి తరలించారు. తన విధి పట్ల నిబద్ధతను చాటుతూనే, తన సొంత వాహనాన్ని ఇచ్చి సాయం చేయాలనుకున్న ఆమె మనసును చూసి నెటిజన్లు, రైల్వే అధికారులు ప్రశంసల వర్షం కురిపిస్తున్నారు.