మద్యం కాలేయానికి (Liver) అత్యంత ప్రమాదకరమని అందరికీ తెలుసు. అయినా చాలా మంది మద్యం వదలరు. తాగడానికి కారణాలు వెతుక్కుంటూనే ఉంటారు. ఇండోర్‌కు చెందిన ప్రముఖ లివర్ స్పెషలిస్ట్ డాక్టర్ వినీత్ గౌతమ్ వద్దకు వచ్చిన ఒక పేషెంట్ ఉదంతం ఇప్పుడు ఇంటర్నెట్‌లో హాట్ టాపిక్‌గా మారింది. ఈ వీడియోను ఇన్‌స్టాగ్రామ్‌లో దాదాపు 1.3 కోట్ల మంది వీక్షించారు.
మద్యం పరిమితి ఎంత ఉండాలి? వీడియోలో డాక్టర్ మరియు పేషెంట్ మధ్య జరిగిన సంభాషణ ఆసక్తికరంగా ఉంది.
- పేషెంట్: “డాక్టర్, నేను రోజూ ఒక క్వార్టర్ (దాదాపు 180-190 ml) మద్యం తాగుతాను.”
- డాక్టర్ స్పందన: “రోజూ ఒక క్వార్టర్ అంటే అది చాలా ఎక్కువ! రోజూ తాగడం వల్ల మీ శరీరానికి జరిగే నష్టం ఊహించలేరు. శాస్త్రీయంగా చెప్పాలంటే, వారానికి కేవలం 240 ml మద్యం మాత్రమే (ఒక క్వార్టర్ కంటే కొంచెం ఎక్కువ) గరిష్ట పరిమితిగా ఉండాలి. అంతకు మించి తాగితే కాలేయం తీవ్రంగా దెబ్బతింటుంది.”
అంటే, రోజూ ఒక క్వార్టర్ తాగే వ్యక్తి, ఉండాల్సిన పరిమితి కంటే 6 రెట్లు ఎక్కువ మద్యం తాగుతున్నాడన్నమాట!
కాలేయం ‘పంక్చర్’ అయింది! సదరు పేషెంట్ గత 10-12 రోజులుగా మద్యం ముట్టలేదని చెప్పడంతో డాక్టర్ ఆశ్చర్యపోయారు. ఎందుకు మానేశారని అడగ్గా.. “కాలేయం పూర్తిగా దెబ్బతిన్నట్లు (పంక్చర్) అనిపిస్తోంది, విపరీతమైన నొప్పి వస్తోంది. అందుకే మానేశాను” అని ఆ వ్యక్తి వాపోయాడు. మద్యం తాగడం వల్ల కాలేయం 90 శాతం పాడైపోయిన కేసులు ఎన్నో ఉన్నాయని డాక్టర్ ఈ సందర్భంగా హెచ్చరించారు.
మద్యం వల్ల కాలేయంపై కలిగే దుష్ప్రభావాలు:
- ఫ్యాటీ లివర్: కాలేయంలో అనవసరమైన కొవ్వు పేరుకుపోతుంది.
- ఆల్కహాలిక్ హెపటైటిస్: కాలేయంలో వాపు వస్తుంది.
- లివర్ సిరోసిస్: ఇది అత్యంత ప్రమాదకర స్థితి. కాలేయం మెల్లగా తన పనితీరును కోల్పోతుంది. దీనికి చివరి పరిష్కారం లివర్ ట్రాన్స్‌ప్లాంట్ మాత్రమే.