అమెరికా అధ్యక్షుడు డొనాల్డ్ ట్రంప్, చైనా అధ్యక్షుడు షి జిన్‌పింగ్ మధ్య వాషింగ్టన్‌లోని వైట్‌హౌస్‌లో జరిగిన భేటీ అంతర్జాతీయంగా ఆసక్తిని రేకెత్తించింది. ఈ సందర్భంగా ఇరు దేశాల సంబంధాలను బలోపేతం చేసే దిశగా జిన్‌పింగ్ కీలక ప్రకటన చేశారు.
ట్రంప్‌తో కలిసి మీడియాతో మాట్లాడిన జిన్‌పింగ్.. వచ్చే ఐదేళ్లలో లక్ష మంది యువ అమెరికన్ విద్యార్థులను చైనాకు ఆహ్వానిస్తున్నట్లు ప్రకటించారు. విద్యా, సాంస్కృతిక మార్పిడి కార్యక్రమాల్లో భాగంగా ఈ విద్యార్థులు చైనాను సందర్శించేలా ఈ కార్యక్రమాన్ని రూపొందించినట్లు తెలిపారు.
ఇప్పటికే 2023లో ప్రకటించిన ఓ కార్యక్రమం ద్వారా లక్ష్యంగా పెట్టుకున్న గడువు కంటే ముందుగానే సుమారు 50 వేల మంది యువ అమెరికన్లు చైనాను సందర్శించి విద్యా మార్పిడి కార్యక్రమాల్లో పాల్గొని తిరిగి వెళ్లినట్లు జిన్‌పింగ్ పేర్కొన్నారు. దానికి కొనసాగింపుగానే ఇప్పుడు కొత్త కార్యక్రమాన్ని ప్రకటించినట్లు తెలిపారు.
ఈ సందర్భంగా జిన్‌పింగ్ మాట్లాడుతూ.. “చైనా–అమెరికా సంబంధాలపై నమ్మకం ప్రజల్లో ఉంది. ఈ సంబంధాల భవిష్యత్తు యువత చేతుల్లో ఉంది” అని పేర్కొన్నారు.
అలాగే, రెండో ప్రపంచ యుద్ధం సమయంలో చైనా, అమెరికా కలిసి చేసిన పోరాటాన్ని ఇరు దేశాల అధ్యక్షులు గుర్తు చేసుకున్నారు. ఫాసిజం, ఆక్రమణకు వ్యతిరేకంగా అప్పట్లో ఇరు దేశాలు కలిసి పనిచేసిన చారిత్రక నేపథ్యాన్ని ప్రస్తావించారు.
చైనా, అమెరికా ప్రజల ప్రయోజనాల కోసం ఇరు దేశాలు కలిసి ముందుకు సాగాల్సిన అవసరం ఉందని జిన్‌పింగ్ అన్నారు. “ఇరు దేశాల ప్రజల ఆకాంక్షలను నెరవేర్చేందుకు కలిసి పనిచేద్దాం” అని పేర్కొన్నారు.
మరోవైపు, రెండో ప్రపంచ యుద్ధ సమయంలో చైనా తరఫున పోరాడిన అమెరికాకు చెందిన ‘ఫ్లయింగ్ టైగర్స్’ వైమానిక దళ విభాగాన్ని ట్రంప్ ప్రత్యేకంగా ప్రస్తావించారు.
అలాగే, అమెరికా మెరైన్ దళాలు చైనీయులతో కలిసి పనిచేసిన సమయంలో ప్రాచుర్యంలోకి వచ్చిన ‘Gung Ho’ అనే పదాన్ని కూడా ట్రంప్ ప్రస్తావించారు. దీని అర్థం కలిసి పనిచేయడం అని పేర్కొంటూ.. ఇరు దేశాల ప్రజల మధ్య ఉన్న చారిత్రక అనుబంధాన్ని గుర్తుచేశారు.
రక్షణ, సాంకేతికత, అత్యాధునిక కృత్రిమ మేధస్సు వంటి రంగాల్లో చైనా, అమెరికా కలిసి పనిచేస్తే ప్రపంచ శాంతి, ఆర్థికాభివృద్ధికి దోహదపడుతుందని ఇరు దేశాల నేతలు పేర్కొన్నారు.
ఈ పరిణామాలతో చైనా–అమెరికా సంబంధాల్లో కొత్త అధ్యాయానికి తెరలేచిందా? అనే చర్చ అంతర్జాతీయంగా మొదలైంది.
Leave a Reply