“లారీ కంటే ఎక్కువ వేగం ఎందుకు!”.. విద్యుత్ స్తంభాన్ని ఢీకొని నిప్పంటుకున్న కారు.. దిగ్భ్రాంతికి గురిచేసిన అర్ధరాత్రి రోడ్డు ప్రమాదం..!!!

ఉత్తరప్రదేశ్‌లోని లఖింపూర్ ఖేరీ జిల్లాలో సోమవారం తెల్లవారుజామున అత్యంత ఘోర రోడ్డు ప్రమాదం చోటుచేసుకుంది.

లఖింపూర్ నుంచి సీతాపూర్ వైపు మితిమీరిన వేగంతో దూసుకెళ్తున్న ఒక కారు, ఓయిల్ పోలీస్ స్టేషన్ పరిధిలోని రహదారిపై అదుపుతప్పి పక్కనే ఉన్న విద్యుత్ స్తంభాన్ని బలంగా ఢీకొట్టింది. ఈ భీకర ఢీకొనడంతో కారు ముందు భాగం నుజ్జునుజ్జయింది, క్షణాల వ్యవధిలోనే కారులో భారీగా మంటలు చెలరేగాయి.

విద్యుత్ స్తంభాన్ని ఢీకొన్న వేగానికి కారు పూర్తిగా దగ్ధమవడంతో, లోపల చిక్కుకుపోయిన ముగ్గురు వ్యక్తులు సజీవ దహనమై అక్కడికక్కడే ప్రాణాలు విడిచారు. ప్రమాదంలో తీవ్రంగా గాయపడిన మరో ముగ్గురిని ప్రాణాపాయ స్థితిలో రక్షించి, వెంటనే సమీపంలోని లఖింపూర్ జిల్లా ఆసుపత్రికి తరలించారు. ప్రస్తుతం వారికి అత్యవసర విభాగంలో చికిత్స అందుతోందని, వారి పరిస్థితి విషమంగా ఉందని వైద్య వర్గాలు వెల్లడించాయి.

ఉత్తరప్రదేశ్ ముఖ్యమంత్రి యోగి ఆదిత్యనాథ్ ఈ ఘటనపై తీవ్ర దిగ్భ్రాంతి వ్యక్తం చేస్తూ, మృతుల కుటుంబాలకు ప్రగాఢ సానుభూతి తెలిపారు. బాధిత కుటుంబాలకు తక్షణ సహాయం అందించాలని, క్షతగాత్రులకు మెరుగైన వైద్యం అందేలా చర్యలు తీసుకోవాలని జిల్లా అధికారులను ఆయన ఆదేశించారు.