ఇంట్లో కరెంట్ మరియు ఇంటర్నెట్ కనెక్షన్ కట్ అవ్వడంతో సోమవారం సెలవు అడిగిన ఒక భారతీయ ఉద్యోగికి, అతని మేనేజర్ ఇచ్చిన వార్నింగ్ ఇప్పుడు ఇంటర్నెట్‌లో పెద్ద చర్చకు దారితీసింది.
“ఇకపై సెలవు అడిగితే నువ్వు ఉద్యోగం వదిలేసి వెళ్ళిపోయినట్లుగా పరిగణించబడుతుంది” అని మేనేజర్ బెదిరిస్తూ మెసేజ్ పంపగా, ఆ ఉద్యోగి ఏమాత్రం భయపడకుండా.. “సరే, ఫిబ్రవరి 7వ తేదీనే నా చివరి పని దినంగా భావించండి” అంటూ వాట్సాప్‌లోనే రాజీనామా లేఖను పంపేశాడు. “నేను నిజం చెప్పడమే నా తప్పైపోయింది” అని అతను జోడించిన ఆ ఒక్క మాట మేనేజర్ గర్వాన్ని అణచివేసింది.
ఈ ఘటన ‘రెడ్డిట్’ (Reddit) వేదికగా షేర్ చేసిన కొన్ని గంటల్లోనే 1,200కు పైగా లైకులను సొంతం చేసుకుంది. రాజీనామా మెసేజ్ చూడగానే కంగారు పడిపోయిన మేనేజర్, వెంటనే ఆ ఉద్యోగికి ఫోన్ చేసి.. “సమస్యను ఇప్పుడు అర్థం చేసుకున్నాను, మంగళవారం వరకు సెలవు తీసుకోండి” అని బతిమిలాడుతూ దిగి వచ్చాడు. “ఆత్మగౌరవమే ముఖ్యం” అంటూ ఆ ఉద్యోగిని నెటిజన్లు అభినందిస్తున్నారు. కార్పొరేట్ కంపెనీల్లో సాగుతున్న ఈ అధికార పోకడను తీవ్రంగా విమర్శిస్తున్నారు.