“లైంగిక వేధింపులపై ఫిర్యాదు చేసిన మహిళే అరెస్ట్”.. ఢిల్లీ ఏసీపీపై ఫిర్యాదు చేసిన బాధితురాలికి జరిగిన దారుణం.. సీజేపీ సంస్థ సంచలన ఆరోపణలు..!!

రాజధాని ఢిల్లీలో ఉన్నత పదవిలో ఉన్న పోలీసు అసిస్టెంట్ కమిషనర్ (ఏసీపీ) పై లైంగిక వేధింపుల ఫిర్యాదు చేసిన మహిళనే ఢిల్లీ పోలీసులు అనూహ్యంగా అదుపులోకి తీసుకున్న ఘటన తీవ్ర దిగ్భ్రాంతిని, ఆగ్రహాన్ని రేకెత్తిస్తోంది.

ఈ ఘటనపై ‘సిటిజన్స్ ఫర్ జస్టిస్ అండ్ పీస్’ (సీజేపీ – CJP) సంస్థ న్యాయ విభాగం అధిపతి రత్నా సింగ్ అత్యంత తీవ్రమైన ఆరోపణలు చేశారు.

విలేకరులతో మాట్లాడిన రత్నా సింగ్.. “ఢిల్లీ ఏసీపీపై లైంగిక వేధింపుల ఫిర్యాదు చేసిన మహిళను ఈరోజు ఉదయం పోలీసులు బలవంతంగా అదుపులోకి తీసుకువెళ్లారు. అంతేకాకుండా, ఆ ఉన్నతాధికారిపై ఎఫ్ఐఆర్ (FIR) నమోదు చేయాలని కోరుతూ శాంతియుతంగా ఆందోళన చేపట్టిన 17 మంది సీజేపీ సంస్థ సభ్యులను కూడా పోలీసులు అరెస్టు చేసి కస్టడీలో ఉంచారు” అని తెలిపారు.

ఆమె ఇంకా మాట్లాడుతూ.. “కస్టడీలో ఉన్న బాధితురాలిని, సీజేపీ సభ్యులను పోలీసులు అత్యంత క్రూరంగా కొట్టారు” అని సంచలన ఆరోపణలు చేశారు. లైంగిక వేధింపులకు గురైన బాధితురాలికి న్యాయం చేయాల్సింది పోయి, ఫిర్యాదు చేసిన మహిళనే అదుపులోకి తీసుకుని దాడి చేసిన ఢిల్లీ పోలీసుల ఈ అరాచక చర్య జాతీయ స్థాయిలో తీవ్ర సంచలనాన్ని, మానవ హక్కుల కార్యకర్తల ఆగ్రహాన్ని రేకెత్తించింది.