“లోపలికి రానివ్వని కర్కశత్వం.. మురుగుకాల్వ పక్కన జన్మించిన ప్రాణం!” – ఉత్తరప్రదేశ్‌లో అమానవీయ ఘటన. స్థానికంగా తీవ్ర దిగ్భ్రాంతిని కలిగించిన ఉదంతం..!!!

ఉత్తరప్రదేశ్ రాష్ట్రం భదోహీ జిల్లాలో ఆసుపత్రి సిబ్బంది చేర్చుకోవడానికి నిరాకరించడంతో, 20 ఏళ్ల గిరిజన మహిళ రోడ్డు పక్కనే ప్రసవించిన ఘటన ఆ ప్రాంతంలో తీవ్ర దిగ్భ్రాంతిని, ఆగ్రహాన్ని కలిగించింది.

ఒక నర్సు చూపించిన కుల వివక్షే ఇందుకు కారణమని ఆ మహిళ కుటుంబ సభ్యులు బహిరంగంగా ఆరోపించారు.

భదోహీ జిల్లా జ్ఞాన్‌పూర్‌లోని మహారాజా చేత్ సింగ్ జిల్లా ఆసుపత్రి వెలుపల ఈ ఘటన చోటుచేసుకుంది. జోరాయ్ గ్రామానికి చెందిన రాణీ దేవి అనే 20 ఏళ్ల మహిళ మంగళవారం రాత్రి తీవ్రమైన పురిటి నొప్పులతో బాధపడుతుండగా, ఆమె కుటుంబ సభ్యులు ఆమెను ఈ ఆసుపత్రికి తీసుకువచ్చారు. కానీ, ఆమె ‘ముసహర్’ అనే గిరిజన సామాజిక వర్గానికి చెందినది కావడంతో అక్కడి విధుల్లో ఉన్న నర్సు నీలమ్ మౌర్య ఆమెకు వైద్యం చేయడానికి నిరాకరించిందని రాణి సోదరుడు విజయ్ కుమార్ ఆరోపించాడు.

ఉన్నతాధికారులు ఎవరూ జోక్యం చేసుకోకపోవడంతో, తీవ్ర నిరాశకు గురైన కుటుంబ సభ్యులు ఆమెను తిరిగి ఇంటికి తీసుకెళ్లేందుకు ప్రయత్నించారు. ఆ సమయంలో ఆసుపత్రి గేటు దగ్గర నొప్పులు తీవ్రం కావడంతో, అక్కడున్న కొందరు మహిళలు బట్టను అడ్డుగా పట్టుకుని ప్రసవం జరిగేలా సహాయం చేశారు.

ఈ ఘటన గురించి సమాచారం అందుకున్న చీఫ్ మెడికల్ ఆఫీసర్ (సీఎంఓ) డాక్టర్ ఎస్.కె. చక్, స్వయంగా అక్కడికి చేరుకుని తల్లీబిడ్డలను కాపాడి అత్యవసర చికిత్స విభాగంలో చేర్పించారు. అయితే, మహిళ శరీరంలో హిమోగ్లోబిన్ స్థాయి కేవలం 5 గ్రాములు మాత్రమే ఉన్నందున, మెరుగైన చికిత్స కోసం బీహెచ్‌యూ (BHU) ఆసుపత్రికి తీసుకెళ్లాలని తాము సూచించామని, కానీ 102 అంబులెన్స్ అందుబాటులో లేకపోవడంతో తిరిగి వెళ్తుండగా రోడ్డుపైనే ప్రసవం జరిగిందని ఆయన వివరణ ఇచ్చారు. ప్రస్తుతం ఆ మహిళకు ప్లాస్మా చికిత్స అందిస్తున్నారు.

ఈ ఘటనపై సమగ్ర విచారణ జరిపేందుకు నలుగురు సభ్యులతో కూడిన విచారణ కమిటీని ఏర్పాటు చేసినట్లు తెలిపిన సీఎంఓ, తప్పు చేసిన వారిపై కఠిన చర్యలు తీసుకుంటామని హామీ ఇచ్చారు. అలాగే, భదోహీ జిల్లా కలెక్టర్ శైలేష్ కుమార్ ఈ విషయాన్ని తీవ్రంగా పరిగణించి, సంబంధిత వైద్యుడు, నర్సు మరియు ఆసుపత్రి యాజమాన్యంపై కఠిన విచారణకు ఆదేశించారు.