టెహ్రాన్: ఇరాన్ యుద్ధంలో అమెరికా మరియు ఇజ్రాయెల్‌లను విస్మయానికి గురిచేసింది ఇరాన్ యొక్క బాలిస్టిక్ క్షిపణులు లేదా డ్రోన్లు మాత్రమే కాదు. వందకు పైగా ఉపగ్రహాలతో కూడిన చైనా ‘జిలిన్-1’ (Jilin-1) శాటిలైట్ నెట్‌వర్క్ అమెరికాను కోలుకోలేని దెబ్బ తీసింది.
చైనాకు చెందిన ఈ ఉపగ్రహ వ్యవస్థ, అమెరికా సైన్యం ఎక్కడెక్కడ దాక్కుంది, ఆయుధాలను ఎటువైపు తరలిస్తోంది అనే సమాచారాన్ని జియో-లొకేషన్‌తో సహా ఎప్పటికప్పుడు ఇరాన్‌కు చేరవేసింది. ఈ సమాచారాన్ని ఉపయోగించుకునే ఇరాన్ ఖచ్చితత్వంతో క్షిపణులను ప్రయోగించింది. ఖతార్‌లోని భారీ సైనిక స్థావరం అల్-ఉదైద్ (Al-Udeid) మరియు జోర్డాన్‌లోని మువాఫక్ సాల్టి (Muwaffaq Salti) ఎయిర్ బేస్‌లను ఇరాన్ క్షిపణులు ధ్వంసం చేయగలిగాయంటే దానికి కారణం చైనా అందించిన సమాచారమే.
అమెరికా కుట్రలను బయటపెట్టిన రష్యా
గల్ఫ్ దేశాలలో జరిగిన కొన్ని దాడులు, టర్కీ మరియు అజర్బైజాన్‌లపైకి వెళ్లిన క్షిపణులు, ఖతార్‌లోని నీటి శుద్ధి ప్లాంట్‌ను ధ్వంసం చేసిన ఘటనల వెనుక ఉన్నది ఇరాన్ కాదు, అమెరికా అని రష్యా ఉపగ్రహాలు ఆధారాలతో సహా నిరూపించాయి. ఇరాన్‌పై మిగిలిన దేశాలను ఉసిగొల్పడానికి అమెరికా ఆడిన ఈ నాటకాన్ని రష్యా బయటపెట్టడంతో ప్రపంచం షాక్‌కు గురైంది. దీనివల్ల ఐరోపా దేశాలు లేదా గల్ఫ్ దేశాల నుండి అమెరికా ఆశించిన స్థాయిలో సైనిక మద్దతు లభించలేదు. గతంలో అమెరికా మాటలు నమ్మి మోసపోయిన చరిత్ర ఉండటంతో, ఇరాన్‌లో భూతల యుద్ధం చేయడానికి కుర్దులు (Kurds) కూడా నిరాకరించడం అమెరికాకు పెద్ద ఎదురుదెబ్బగా మారింది.
అమెరికా గగనతల రక్షణ వ్యవస్థకు ‘కళ్లు’ పోయాయి
చైనా అందించిన జియో-లొకేషన్ మ్యాపుల ఆధారంగా ఇరాన్ క్షిపణులు అమెరికాపై నిప్పులు కురిపించాయి. అమెరికా గగనతల రక్షణ వ్యవస్థకు వెన్నెముక వంటి $300 మిలియన్ల విలువైన AN/TPY-2 రాడార్ సిస్టమ్‌ను ఇరాన్ ధ్వంసం చేసింది. దీనితో పశ్చిమ ఆసియాలో అమెరికా-ఇజ్రాయెల్ రక్షణ వ్యవస్థలకు ‘చూపు’ కోల్పోయినట్లయింది. చివరకు THAAD వంటి అత్యాధునిక క్షిపణి నిరోధక వ్యవస్థలు కూడా ఇరాన్ క్షిపణులను గుర్తించడంలో విఫలమయ్యాయి.
చైనా ‘జియోస్పేషియల్ ఇంటెలిజెన్స్’ విస్మయం
అమెరికా సముద్రగర్భంలో దాచిన విమానవాహక నౌకల లొకేషన్‌ను కూడా చైనా నిమిషాల్లో కనిపెట్టింది. అమెరికా యొక్క అత్యంత శక్తివంతమైన F-22 స్టెల్త్ యుద్ధ విమానాల విన్యాసాలను చైనా తన సోషల్ మీడియాలో సాధారణ పోస్టుల వలె ప్రచారం చేయడం అమెరికాకు పెద్ద అవమానంగా మారింది. గతంలో అమెరికా గూఢచారి సంస్థలకు మాత్రమే సాధ్యమైన సాంకేతిక విద్యను, ఇప్పుడు చైనాలోని ‘మిజార్ విజన్’ (Mizar Vision) అనే చిన్న ఐటీ కంపెనీ అతి తక్కువ ఖర్చుతో చేసి చూపిస్తుండటం ప్రపంచవ్యాప్తంగా చర్చనీయాంశమైంది.