ఇండోర్ బ్యూరో: మధ్యప్రదేశ్ రాజకీయాల్లో ‘వందేమాతరం’ గీతం చిచ్చు రేపింది. మున్సిపల్ కార్పొరేషన్ సమావేశంలో జాతీయ గీతాన్ని పాడేందుకు నిరాకరించిన ఇద్దరు కాంగ్రెస్ మహిళా కార్పొరేటర్ల వ్యవహారం ఇప్పుడు దేశవ్యాప్తంగా చర్చనీయాంశమైంది. “మా ఇస్లాం ధర్మంలో వందేమాతరం పాడేందుకు అనుమతి లేదు” అని వారు చేసిన వ్యాఖ్యలు రాజకీయ వర్గాల్లో పెను తుపానును సృష్టించాయి. ఈ ఘటనపై అటు బీజేపీ మాత్రమే కాదు.. ఇటు కాంగ్రెస్ పార్టీ సైతం తన సొంత సభ్యులపై తీవ్రస్థాయిలో విరుచుకుపడింది.
అసలేం జరిగింది? ఇండోర్ మున్సిపల్ కార్పొరేషన్ సమావేశం ప్రారంభం కాగానే సాంప్రదాయబద్ధంగా ‘వందేమాతరం’ ఆలపించడం మొదలైంది. ఈ క్రమంలో కాంగ్రెస్ కార్పొరేటర్లు ఫౌజియా షేక్ ఆలీమ్, రుబినా ఇక్బాల్‌లు లేచి నిలబడకుండా, గీతాన్ని పాడకుండా మౌనంగా కూర్చున్నారు. దీనిని గమనించిన బీజేపీ సభ్యులు తీవ్ర అభ్యంతరం వ్యక్తం చేశారు. ఇది జాతీయ గీతానికి, దేశ గౌరవానికి అవమానమని నినాదాలు చేస్తూ.. వారు క్షమాపణలు చెప్పాలని డిమాండ్ చేశారు.
దీనిపై కాంగ్రెస్ సభ్యురాలు ఫౌజియా ఎదురుదాడి చేస్తూ.. “వందేమాతరం పాడాలని ఎక్కడైనా లిఖితపూర్వక నియమం ఉందా? ఆ ఆర్డర్ చూపించండి” అని సవాలు విసిరారు. వాగ్వాదం ముదరడంతో సభాధ్యక్షుడు మున్నాలాల్ యాదవ్ ఆమెను సభ నుంచి బయటకు వెళ్లాల్సిందిగా ఆదేశించారు.
మత విశ్వాసాల సాకుతో సమర్థన: సభ వెలుపల రుబినా ఇక్బాల్ మీడియా ముందుకు వచ్చి తన నిలకడను స్పష్టం చేశారు. “మా ఇస్లాం ప్రకారం అల్లాహ్ ఒక్కడే దేవుడు. ‘వందే’ అంటే వందనం చేయడం లేదా పూజించడం. మేము అల్లాహ్ తప్ప ఎవరికీ తలవంచం. ఇది మా మత విశ్వాసం. కావాలంటే ‘సారే జహాసె అచ్చా’ పాడతాం కానీ, వందేమాతరం పాడటం మా ధర్మంలో నిషిద్ధం” అని ఖరాఖండిగా చెప్పారు. అంతేకాకుండా, ముస్లింలను కేవలం ఓటు బ్యాంకుగా వాడుకుంటున్నారని కాంగ్రెస్‌పై కూడా విమర్శలు గుప్పించారు. పార్టీ నుంచి తొలగిస్తే తాము స్వతంత్రంగా లేదా అసదుద్దీన్ ఓవైసీ (AIMIM) పార్టీలో చేరుతామని హెచ్చరించారు.
బీజేపీ ఆక్రోశం.. కాంగ్రెస్ ‘షాకింగ్’ రియాక్షన్!
- బీజేపీ స్పందన: “స్వాతంత్ర్య పోరాటంలో అష్ఫాకుల్లా ఖాన్ వంటి ముస్లిం విప్లవకారులు ‘వందేమాతరం’ అంటూనే ఉరికొయ్యలను ముద్దాడారు. అటువంటి వీరులను ఈ కార్పొరేటర్లు అవమానిస్తున్నారు” అని బీజేపీ నేత సుమిత్ మిశ్రా ఆగ్రహం వ్యక్తం చేశారు.
- కాంగ్రెస్ ఘాటు విమర్శ: ఈ ఘటనతో కాంగ్రెస్ తీవ్ర ఇరకాటంలో పడింది. పార్టీ ప్రతినిధి కే.కే. మిశ్రా అత్యంత కఠిన పదజాలంతో స్పందించారు. “ఎవరికైతే దేశ ప్రయోజనాలు ముఖ్యం కాదో, ఎవరైతే వందేమాతరం పాడలేరో.. వారు పాకిస్థాన్‌కు వెళ్లి బతకవచ్చు. ఇటువంటి వారిని కాంగ్రెస్ సహించదు. వారిపై కఠిన క్రమశిక్షణా చర్యలు తీసుకుంటాం” అని స్పష్టం చేశారు.
ప్రస్తుతం ఈ ఇద్దరు కార్పొరేటర్లపై దేశద్రోహం కేసు నమోదు చేసేందుకు బీజేపీ సిద్ధమవుతుండటంతో ఇండోర్ రాజకీయం ఒక్కసారిగా వేడెక్కింది.