దేశంలోని అతిపెద్ద పోంజీ స్కామ్లలో ఒకటైన ‘హీరా గ్రూప్ ఆఫ్ కంపెనీస్’ వ్యవస్థాపకురాలు నౌహేరా షేక్ను ఎన్ఫోర్స్మెంట్ డైరెక్టరేట్ (ED) మరియు హర్యానా పోలీసులు సంయుక్తంగా చేపట్టిన ఆపరేషన్లో గురుగ్రామ్లో అరెస్టు చేశారు. షరియా చట్టాల పేరుతో దేశవ్యాప్తంగా లక్షలాది మంది ముస్లింలను నమ్మించి రూ. 3,000 కోట్లకు పైగా మోసం చేసిన నౌహేరా, గత నెల రోజులుగా పరారీలో ఉంది. దర్యాప్తు సంస్థల కళ్లుగప్పేందుకు గురుగ్రామ్ సెక్టార్-45లో ‘షేక్ ఖామర్ జహాన్’ అనే నకిలీ పేరుతో ఆమె తలదాచుకుంటోంది.
షరియా పేరుతో మోసాల వల: షరియా చట్టం ప్రకారం వడ్డీ (రిబా) తీసుకోవడం లేదా ఇవ్వడం హరామ్ (నిషిద్ధం) అని నమ్మే ముస్లింల మత విశ్వాసాలను నౌహేరా షేక్ తన మోసానికి ఆయుధంగా మార్చుకుంది. తన కంపెనీలు షరియా నిబంధనలను పాటిస్తూ వ్యాపారం చేస్తున్నాయని నమ్మించి, పెట్టుబడి పెడితే ఏటా 36 శాతం భారీ లాభం ఇస్తానని ఆశ చూపింది. తొలినాళ్లలో కొంతమందికి లాభాలు చూపించి నమ్మకాన్ని గెలుచుకుని, ఆ తర్వాత భారీగా పెట్టుబడులను సేకరించింది.
1.72 లక్షల మంది పెట్టుబడిదారుల సొమ్ము ఆవిరి: ఈడీ గణాంకాల ప్రకారం, నౌహేరా షేక్ మరియు ఆమె అనుచరులు మొత్తం రూ. 5,978 కోట్లకు పైగా వసూలు చేశారు. పెట్టుబడిదారులకు అసలు, లాభాలు చెల్లించాల్సిన సమయానికి కంపెనీ చేతులెత్తేసింది. ఈ మహా కుంభకోణంలో సుమారు 1.72 లక్షల మంది పెట్టుబడిదారుల సొమ్ము (రూ. 3,000 కోట్లు) ఆవిరైపోయింది. సుప్రీంకోర్టు బెయిల్ తిరస్కరించి, లొంగిపోవాలని ఆదేశించినా ఆమె పరారీలో ఉంది.
ఆలీషాన్ జీవనశైలి: ఈడీ దాడుల్లో నౌహేరా విలాసవంతమైన జీవనశైలి బయటపడింది. ఆమె స్థావరాల్లో 12 లగ్జరీ కార్లు (BMW, మెర్సిడెస్ బెంజ్ వంటివి) మరియు రూ. 92 లక్షల నగదును దర్యాప్తు అధికారులు స్వాధీనం చేసుకున్నారు. దర్యాప్తును ఆపడానికి ఆమె ముఠా ఎంతగా ప్రయత్నించిందంటే, ఒక అనుచరుడు తనను తాను ‘కళ్యాణ్ బెనర్జీ’గా, పీఎంఓ (PMO) అధికారిగా చెప్పుకుంటూ బెదిరింపులకు దిగాడు. ఆ నకిలీ అధికారిని ఈ ఏడాది జనవరిలో పోలీసులు అరెస్టు చేశారు.
రూ. 400 కోట్ల ఆస్తుల జప్తు: సుప్రీంకోర్టు ఆదేశాల మేరకు, ఇప్పటివరకు నౌహేరా షేక్ మరియు ఆమె బంధువులకు చెందిన రూ. 400 కోట్ల విలువైన ఆస్తులను ఈడీ జప్తు చేసింది. ఈ ఆస్తులను వేలం వేసి, బాధితులకు వారి డబ్బును తిరిగి ఇచ్చే ప్రక్రియను కోర్టు ప్రారంభించింది. నౌహేరా తరపున న్యాయవాదులు పలు నకిలీ అఫిడవిట్లను దాఖలు చేసి వేలం ప్రక్రియను అడ్డుకోవాలని ప్రయత్నించినప్పటికీ, చివరకు గురుగ్రామ్లో ఆమె అరెస్టు కావడంతో ‘లేడీ నట్వర్లాల్’ సామ్రాజ్యం అంతమైంది.