బాలీవుడ్ చిత్ర పరిశ్రమలో తనదైన ప్రత్యేక ఫ్యాషన్ ఎంపికలతో ఎప్పుడూ అందరి దృష్టిని ఆకర్షించే నటి కంగనా రనౌత్.
సాంప్రదాయ వస్త్రాలైనా, ఆధునిక ట్రెండీ దుస్తులైనా సరే.. తనదైన శైలిలో మెరిసిపోయే ఆమె, ఇటీవల జరిగిన నవరాత్రి వేడుకల కోసం ధరించిన విలాసవంతమైన లెహంగా ప్రస్తుతం నెట్టింట తెగ వైరల్ అవుతోంది.
ప్రముఖ డిజైనర్ బ్రాండ్ ‘తోరాణి’ (Torani) రూపొందించిన ‘జోగియా’ కలెక్షన్ నుండి ‘సూర్ రక్తిక మంజ్థ్రా’ అనే లెహంగా సెట్‌ను కంగనా ధరించారు. దీని విలువ భారతీయ కరెన్సీలో దాదాపు రూ. 2,10,500. సింధు లోయ నాగరికత, ప్రాచీన సంచార సంస్కృతిని మూల కథాంశంగా తీసుకుని డిజైన్ చేసిన ఈ దుస్తులు, కళ్లు చెదిరే రంగులు మరియు అద్భుతమైన కళాత్మక పనితనంతో అందరినీ కట్టిపడేస్తున్నాయి.
ముదురు ఎరుపు రంగు ప్రధాన నేపథ్యంగా ఉన్న ఈ లెహంగా లంగాపై విభిన్న రంగుల ప్రింట్లు ప్రత్యేక ఆకర్షణగా నిలిచాయి. దీనికితోడు సూక్ష్మమైన ఎంబ్రాయిడరీ వర్క్, వెనుక క్రిస్-క్రాస్ టై-అప్ నాడాలతో కూడిన చోళీ (బ్లౌజ్) ఈ దుస్తులకు మరింత నిండుదనాన్ని ఇచ్చింది. వీటికి చక్కగా నప్పేలా డిజైన్ చేసిన అందమైన దుపట్టాను కూడా ఆమె ధరించారు.
ఈ సాంప్రదాయక రాయల్ లుక్‌ను మరింత పరిపూర్ణం చేయడానికి ఆమె భారీ ఆక్సిడైజ్డ్ సిల్వర్ ఆభరణాలు, లేయర్డ్ నెక్లెస్‌లు, పెద్ద కఫ్ గాజులు, గుండ్రని మాంగ్ టీకాను ఎంచుకున్నారు. జుట్టును చక్కగా జడ అల్లుకుని, పూలతో అలంకరించి పక్కా క్లాసిక్ లుక్ ఇచ్చారు. కళ్ళకు వింగ్డ్ ఐలైనర్, పెదవులకు న్యూడ్ లిప్‌స్టిక్ వేసుకుని చేసిన మేకప్ ఆమె అందాన్ని రెట్టింపు చేసింది.
Leave a Reply