బెంగళూరు: బెంగళూరు విశ్వవిద్యాలయం జ్ఞానభారతి క్యాంపస్‌లో అర్ధరాత్రి పూట హాస్టల్ విద్యార్థినులు పెద్ద ఎత్తున రోడ్డెక్కి నిరసన చేపట్టారు. డిగ్రీ మరియు పోస్ట్ గ్రాడ్యుయేషన్ చదువుతున్న విద్యార్థినులు ఈ ధర్నాలో పాల్గొన్నారు.
ప్రధాన ఆరోపణలు: హాస్టల్‌లో కనీస మౌలిక సదుపాయాలు కల్పించడంలో అధికారులు నిర్లక్ష్యం వహిస్తున్నారని విద్యార్థినులు ఆరోపించారు. దీనితో పాటు, కొందరు వ్యక్తులు విద్యార్థినుల వ్యక్తిత్వాన్ని హననం చేసేలా దుష్ప్రచారం చేస్తున్నారని వారు మండిపడ్డారు. ముఖ్యంగా హాస్టల్ వార్డెన్ మరియు విద్యార్థినుల మధ్య అక్రమ సంబంధం ఉందంటూ హాస్టల్ సూపర్‌వైజర్ తప్పుడు పుకార్లు పుట్టిస్తున్నారని వారు ఆవేదన వ్యక్తం చేశారు. దురుద్దేశంతోనే తమపై ఇటువంటి అసత్య ఆరోపణలు చేస్తున్నారని విద్యార్థినులు ఆరోపించారు.
ఈశాన్య రాష్ట్రాలకు చెందిన విద్యార్థినులు హాస్టల్ సమీపంలోని రహదారిపై బైఠాయించి తమ ఆగ్రహాన్ని వ్యక్తం చేశారు. విశ్వవిద్యాలయ యంత్రాంగం ఈ విషయంలో తీవ్ర నిర్లక్ష్యం వహిస్తోందని, ఫిర్యాదు చేసినా ఎలాంటి చర్యలు తీసుకోలేదని వారు వాపోయారు. తక్షణమే ఈ విషయంపై విచారణ జరిపి చర్యలు తీసుకోవాలని వారు డిమాండ్ చేశారు. సమాచారం అందుకున్న జ్ఞానభారతి పోలీస్ స్టేషన్ సిబ్బంది ధర్నా స్థలానికి చేరుకుని పరిస్థితిని సమీక్షించారు.