విడాకులు అంటే భార్యాభర్తల బంధం ముగియడంతోనే ఆగిపోదు. ఆ తర్వాత భరణం, పిల్లల చదువు మరియు సంరక్షణ ఖర్చులు, వేరే ఇల్లు, న్యాయవాది ఫీజులు, అప్పటికే ఉన్న అప్పులు, నెలవారీ వాయిదాలు (EMI) వంటి పలు బాధ్యతలు వచ్చిపడతాయి.
ఇవన్నీ ఒక్కసారిగా మీద పడటంతో కొందరికి ఆర్థిక ఒత్తిడితో పాటు మానసిక ఒత్తిడి కూడా పెరుగుతుంది.
ఈ క్రమంలో సాఫ్ట్‌వేర్ ఇంజనీర్ సంభవ్ జైన్ మరణం చర్చనీయాంశమైంది. భార్యతో గొడవలు, విడాకుల కేసు, నెలలు నిండకుండానే పుట్టిన బిడ్డ వైద్యం కోసం రూ.30 లక్షలకు పైగా ఖర్చు కావడం, మాజీ భార్యకు రూ.15 లక్షలు భరణంగా ఇవ్వాలని కోర్టు ఆదేశించడం వంటివి ఆయన మరణానికి దారితీసినట్లు సమాచారం. పెరిగిన అప్పులు, ఆర్థిక భారమే అతని జీవితంపై తీవ్ర ప్రభావం చూపాయని వార్తలు చెబుతున్నాయి.
మానసిక వైద్య నిపుణుడు డాక్టర్ సమీర్ మల్హోత్రా మాట్లాడుతూ.. విడాకుల తర్వాత ఏర్పడే ఆర్థిక భారాన్ని కేవలం భరణంతో మాత్రమే అంచనా వేయలేమన్నారు. పిల్లల చదువు, సంరక్షణ, ఇంటి అద్దె, న్యాయపరమైన ఖర్చులు, అప్పులు, నెలవారీ వాయిదాలు, ఆస్తులకు సంబంధించిన బాధ్యతలు ఇలా ఒకేసారి పలు ఖర్చులు పెరుగుతాయని చెప్పారు. అప్పటికే అప్పుల్లో ఉన్నవారికి లేదా తక్కువ ఆదాయం ఉన్నవారికి ఈ ఒత్తిడి మరింత ఎక్కువగా ఉంటుందని వివరించారు.
భారతదేశంలో భరణాన్ని నిర్ణయించడానికి అందరికీ వర్తించే ఒకే ఒక ప్రామాణిక పద్ధతి అంటూ ఏదీ లేదు. సంబంధిత వ్యక్తుల ఆదాయం, ఆస్తులు, అప్పులు, ఖర్చులు వంటి ఆర్థిక పరిస్థితులను ఆ కేసును బట్టి పరిగణనలోకి తీసుకుంటారు. విడాకుల తర్వాత ఎదురయ్యే ఆర్థిక, మానసిక ఒత్తిడిని కేవలం లింగపరమైన సమస్యగా మాత్రమే చూడకుండా.. వ్యక్తుల పరిస్థితులు, పిల్లల బాధ్యత, చట్టపరమైన బాధ్యతలు, సామాజిక మద్దతు తదితర అంశాలను కూడా పరిగణనలోకి తీసుకోవాలని నిపుణులు సూచిస్తున్నారు.