విశ్లేషణ: టీఎంసీ నామరూపాలు లేకుండా పోతుందా?.. కాంగ్రెస్‌లో విలీన చర్చలు ముగింపు దశకు! అసలు విషయమేంటంటే..

బెంగాల్ ఎన్నికల్లో టీఎంసీ (TMC) ఘోర పరాజయం పాలైనప్పటి నుండి మమతా బెనర్జీకి కాంగ్రెస్ పార్టీతో సాన్నిహిత్యం పెరిగింది. ఇటీవలి బెంగాల్ అసెంబ్లీ ఎన్నికల వరకు కాంగ్రెస్‌కు సింహస్వప్నంగా నిలిచిన మమతకు.. ఇప్పుడు ఒంటరి బలంతో టీఎంసీ ఉనికిని కాపాడుకోవడం అంత సులువు కాదనే విషయం అర్థమైంది.

అందుకే ఆమె నిస్తేజంగా ఉన్న ‘ఇండియా’ (INDIA) కూటమిని మేల్కొల్పడానికి స్వయంగా సమావేశం ఏర్పాటు చేయడంలో చొరవ తీసుకున్నారు. ఆ సమావేశం మరుసటి రోజు కోల్‌కతాకు తిరిగి వెళ్లేముందు.. సోనియా గాంధీ నివాసంలో ఆమెతో దాదాపు గంటకు పైగా సుదీర్ఘంగా చర్చలు జరిపారు. ఆ మరుసటి రోజు మమత మేనల్లుడు అభిషేక్ బెనర్జీ కూడా రాహుల్ గాంధీతో చాలా సేపు మాట్లాడారు. దీని తర్వాతే, కాంగ్రెస్ పార్టీ టీఎంసీని తమలో విలీనం చేయాలనే ప్రతిపాదనను తెచ్చిందనే వార్తలు మీడియాలో గుప్పుమన్నాయి. అంతేకాదు, మమతా బెనర్జీకి కాంగ్రెస్ జాతీయ ఉపాధ్యక్ష పదవిని ఆఫర్ చేసినట్లు కూడా మీడియా నివేదికలు చెబుతున్నాయి. అయితే, బెంగాల్ కాంగ్రెస్ అధ్యక్షుడు శుభంకర్ సర్కార్, మాజీ అధ్యక్షుడు అధీర్ రంజన్ చౌదరి, సీనియర్ నేత అబ్దుల్ మన్నన్ మాత్రం టీఎంసీతో ఎలాంటి సంబంధాలు పెట్టుకోవడానికి లేదా విలీనానికి సుముఖంగా లేరు.

విలీన ప్రతిపాదనను ధృవీకరించిన ఉదిత్ రాజ్: ఈ విలీన వార్తలను కాంగ్రెస్ నేత ఉదిత్ రాజ్ స్వయంగా ధృవీకరించారు. దీదీ (మమతా బెనర్జీ) తన పార్టీని కాంగ్రెస్‌లో విలీనం చేయాలని ఆయన వ్యాఖ్యానించారు. అలాగే ఆమె రాహుల్ గాంధీ నాయకత్వాన్ని అంగీకరించాలని కూడా సూచించారు. అయితే ఇప్పుడు ప్రశ్న ఏమిటంటే.. మమతా బెనర్జీ దీనికి సిద్ధపడతారా? ఈ ప్రశ్న ఎందుకు వస్తోందంటే.. గత టర్మ్‌లో కాంగ్రెస్ నుండి ఉపఎన్నికలో గెలిచిన ఏకైక ఎమ్మెల్యేను కూడా మమత తమ వైపుకు లాగేసుకున్నారు. లోక్‌సభ, అసెంబ్లీ ఎన్నికల్లో ఇండియా కూటమిలో భాగస్వామిగా ఉంటూనే ఆమె కాంగ్రెస్‌ను పక్కన పెట్టారు. అయినప్పటికీ, ప్రస్తుత పరిస్థితులు రోజురోజుకూ ఆమె చేదాటిపోతుండటంతో కాంగ్రెస్ ప్రతిపాదనను మమత అంత సులభంగా తోసిపుచ్చలేకపోతున్నారు.

టీఎంసీ ఎంపీలు, ఎమ్మెల్యేల గుడ్‌బై: ఎన్నికల ఫలితాలు వచ్చినప్పటి నుండి మమతకు అత్యంత నమ్మకస్తులైన నాయకులు పార్టీని వీడటం ప్రారంభించారు. దీనికి పరాకాష్టగా.. టీఎంసీకి చెందిన 80 మంది ఎమ్మెల్యేలలో 58 మంది రీతాబ్రతా బెనర్జీ నాయకత్వంలో అసెంబ్లీలో ప్రత్యేక గ్రూపుగా ఏర్పడ్డారు. లోక్‌సభలో ఉన్న 29 మంది టీఎంసీ ఎంపీలలో 19 మంది కాకోలి ఘోష్ దస్తీదార్ నాయకత్వంలో ప్రత్యేక గ్రూపుగా గుర్తించాలని స్పీకర్‌కు లేఖ రాశారు. ఈ తిరుగుబాటు ప్రజాప్రతినిధుల సంఖ్య మున్ముందు మరింత పెరగొచ్చని తెలుస్తోంది. రాజ్యసభలో టీఎంసీ సభ్యులు సుఖేందు శేఖర్ రాయ్, సుస్మితా దేవ్ లు ఇప్పటికే తమ పార్టీకి, సభ్వత్వానికి రాజీనామా చేశారు. మమతకు మరింత ఆందోళన కలిగించే విషయం ఏంటంటే.. ముస్లిం ఎమ్మెల్యేలు కూడా తిరుగుబాటు వర్గం వైపు మొగ్గు చూపుతున్నారు. కోల్‌కతా మున్సిపల్ కార్పొరేషన్ మేయర్, మమత ప్రభుత్వంలో అత్యంత కీలక మంత్రిగా ఉన్న ఫిర్హాద్ హకీమ్ సైతం తిరుగుబాటు వర్గంలోనే ఉండాలని నిర్ణయించుకున్నారు. టీఎంసీలో జరుగుతున్న ఈ పరిణామాలన్నీ మమతకు పెద్ద షాక్ అనే చెప్పాలి.

స్థానిక సంస్థల్లో టీఎంసీ కౌన్సిలర్ల వరుస రాజీనామాలు: మే 4వ తేదీన అసెంబ్లీ ఎన్నికల ఫలితాలు వచ్చినప్పటి నుండి బెంగాల్‌లోని నగర పాలక సంస్థలు (మున్సిపల్ కార్పొరేషన్లు), మున్సిపాలిటీల్లో రాజీనామాల పర్వం కొనసాగుతోంది. కోల్‌కతా మేయర్ ఫిర్హాద్ హకీమ్ రాజీనామా చేయడంతో పాటు పలువురు కౌన్సిలర్లు మమతకు ముఖం చాటేశారు. వివిధ క్రిమినల్ ఆరోపణల్లో కౌన్సిలర్లు, స్థానిక రౌడీలు అరెస్ట్ అవుతుండటంతో పార్టీలో గందరగోళం నెలకొంది. ఇప్పటివరకు దాదాపు 10-11 మంది కౌన్సిలర్లు అరెస్టయ్యారు. చాలా కార్పొరేషన్లలో ప్రభుత్వమే అడ్మినిస్ట్రేటర్లను (పాలకులను) నియమించాల్సి వచ్చింది. మమత పిలిచిన సమావేశానికి 30-31 మంది టీఎంసీ కౌన్సిలర్లు గైర్హాజరయ్యారు. బిధాన్‌నగర్ మేయర్ కూడా రాజీనామా చేశారు. హుగ్లీ జిల్లా పరిధిలోని చందన్‌నగర్ మున్సిపల్ కార్పొరేషన్‌లో అయితే రాజీనామాల భూకంపమే వచ్చింది. మేయర్ రామ్ చక్రవర్తితో సహా మొత్తం 33 మంది కౌన్సిలర్లలో 30 మంది రాజీనామా లేఖలు సమర్పించారు. దాదాపు 10-11 మున్సిపాలిటీల్లో మేయర్లు, కౌన్సిలర్లు పదవులను వీడారు. ఈ పరిస్థితులన్నీ చూశాక మమతకు ప్రస్తుత రాజకీయ క్షేత్రస్థాయి పరిస్థితి ఏంటో అర్థమై ఉంటుంది.

ప్రజా ఆగ్రహ తీవ్రతను గమనించిన మమత: ప్రజల్లో తన ప్రభుత్వంపై ఉన్న తీవ్ర వ్యతిరేకతను మమత పసిగట్టారు. ఓటర్లు ఎన్నికల్లోనే తమ నిరసనను స్పష్టంగా చూపించారు. తృణమూల్ నాయకులకు వ్యతిరేకంగా ‘చోర్-చోర్’ (దొంగ-దొంగ) అంటూ వినిపిస్తున్న నినాదాలు, వారిపై జరుగుతున్న దాడుల ఘటనలను బట్టి.. ఈ పరిస్థితిని ఒంటరిగా ఎదుర్కోవడం తనవల్ల కాదని మమత గ్రహించారు. తన మేనల్లుడు అభిషేక్ బెనర్జీపై జరిగిన దాడిని ఆమె అంత సులభంగా మర్చిపోలేరు. అందుకే ఆమె లోక్‌సభ లేదా రాజ్యసభ సభ్యురాలిగా మారి జాతీయ స్థాయిలో ప్రతిపక్ష రాజకీయాలకు కేంద్ర బిందువు కావాలని భావిస్తున్నారు. తన వద్ద ఇప్పుడు తగినంత సమయం ఉందని, కూటమి అనుకుంటే తన సేవలను వాడుకోవచ్చని ఆమె ఓపెన్‌గానే చెబుతున్నారు.

బెంగాల్ పాత ట్రెండ్ మమతకు తెలుసు: స్వాతంత్ర్యం వచ్చినప్పటి నుండి ఇప్పటివరకు బెంగాల్‌లో కేవలం 3 సార్లు మాత్రమే అధికార మార్పిడి జరిగింది. 1977 వరకు కాంగ్రెస్ పాలన సాగింది. ఆ తర్వాత వామపక్ష కూటమి (Left Front) అధికారంలోకి వచ్చి 2011 వరకు దాదాపు 34 ఏళ్లు పాలించింది. మమతా బెనర్జీ 2011లో వామపక్షాల నుండి అధికారాన్ని లాక్కుని 15 ఏళ్ల పాటు బెంగాల్‌ను పాలించారు. బెంగాల్ రాజకీయాల్లో ఒకసారి అధికారం కోల్పోయిన పార్టీకి లేదా కూటమికి ప్రజలు మళ్లీ రెండో అవకాశం ఇవ్వలేదనే విషయం ఆమెకు బాగా తెలుసు. అధికారం కోల్పోయిన పార్టీని రాష్ట్రంలో నామరూపాలు లేకుండా చేసే రాజకీయ వ్యూహాన్ని గతంలో ఆమె కూడా అనుసరించారు. కాంగ్రెస్‌ను వామపక్షాలు ముంచేస్తే, ఆ వామపక్షాలను మమత నేతృత్వంలోని టీఎంసీ తుడిచిపెట్టేసింది.

మమత ముందున్నది మనుగడ సమస్య: పార్టీ ఉనికిని కాపాడుకోవాలంటే కాంగ్రెస్‌తో పొత్తు పెట్టుకోవడం లేదా విలీనం చేయడం మినహా మరో ప్రత్యామ్నాయం లేదనే నిజం మమతకు అర్థమైంది. అందుకే కాంగ్రెస్‌పై ఎంత అసంతృప్తి ఉన్నప్పటికీ, ఆమె ఇప్పుడు ఆ పార్టీతో చేతులు కలపడానికి ఆరాటపడుతున్నారు. కాంగ్రెస్‌కు కూడా ఆమె బలహీనతను క్యాష్ చేసుకునే అవకాశం దొరికింది. బెంగాల్ కాంగ్రెస్ అధ్యక్షుడు స్పష్టంగా చెబుతున్నదేంటంటే.. మమత మొదట రాహుల్ గాంధీ నాయకత్వాన్ని అంగీకరిస్తేనే చర్చలు జరుగుతాయని. ఈ విలీన ప్రతిపాదన కూడా ఆమె ప్రస్తుత నిస్సహాయతను వాడుకునే వ్యూహమే. మమతకు వేరే దారి లేదు కాబట్టి, ఆమె టీఎంసీని కాంగ్రెస్‌లో విలీనం చేయడానికి సిద్ధపడే అవకాశాలే ఎక్కువగా కనిపిస్తున్నాయి. ఎలాగూ కాంగ్రెస్ ఆమెకు పాత మాతృసంస్థే కదా!