అమెరికా స్టాక్ మార్కెట్లు భారీ పతనంతో ట్రేడ్ అవుతున్న తరుణంలో, ట్రంప్ చేసిన ఒక్క ప్రకటనతో పరిస్థితి మొత్తం మారిపోయింది. దీని ప్రభావంతో రేపు ఆసియా మార్కెట్లు, ముఖ్యంగా భారత మార్కెట్లు పుంజుకోవడమే కాకుండా.. బంగారం, వెండి ధరలు తగ్గే అవకాశం ఉంది.
ట్రంప్ అసలు ఏం చెప్పారు? స్విట్జర్లాండ్‌లోని దావోస్‌లో జరుగుతున్న ప్రపంచ ఆర్థిక వేదిక (WEF) సదస్సులో మాట్లాడిన అమెరికా అధ్యక్షుడు డొనాల్డ్ ట్రంప్, గ్రీన్‌ల్యాండ్‌ను తాము “బలవంతంగా ఆక్రమించబోమని” ప్రకటించారు. ఈ ప్రకటనతో బుధవారం వాల్ స్ట్రీట్ (అమెరికా స్టాక్ మార్కెట్) లాభాలతో ప్రారంభమైంది. అయితే, డెన్మార్క్ నియంత్రణలో ఉన్న గ్రీన్‌ల్యాండ్‌ను అమెరికాలో భాగంగా మార్చేందుకు తక్షణ చర్చలు జరపాలని ఆయన నొక్కి చెప్పారు. గ్రీన్‌ల్యాండ్ విషయంలో ట్రంప్ తన మొండి వైఖరిని వీడటం ఇన్వెస్టర్లలో కొత్త ఆశలను చిగురింపజేసింది.
వెనక్కి తగ్గిన ట్రంప్ (U-Turn)
గ్రీన్‌ల్యాండ్ యొక్క ప్రాముఖ్యత మరియు ఖనిజ సంపదను ప్రస్తావించిన ట్రంప్, ఐరోపా దేశాలపై తాను విధించిన పన్నులను (Tariffs) గుర్తు చేస్తూనే.. గ్రీన్‌ల్యాండ్ విషయంలో సైన్యాన్ని మాత్రం ఉపయోగించబోనని హామీ ఇచ్చారు. ఈ ప్రకటన అంతర్జాతీయ మార్కెట్లకు భారీ ఊరటనిచ్చింది.
అమెరికా మార్కెట్ల జోరు
ట్రంప్ ప్రకటన తర్వాత అమెరికా మార్కెట్లు ఇలా ట్రేడ్ అయ్యాయి:
- డౌ జోన్స్ (Dow Jones): 0.5% పెరిగి 48,748.75 వద్దకు చేరింది.
- S&P 500: 0.4% పెరిగి 6,823.97 వద్దకు చేరింది.
- నాస్డాక్ (Nasdaq): 0.2% పెరిగి 22,991.96 వద్ద కొనసాగింది.
మంగళవారం ఐరోపా దేశాలపై పన్నుల భయంతో కుప్పకూలిన మార్కెట్లు, ఇప్పుడు ఆ ఉద్రిక్తతలు తగ్గడంతో కోలుకున్నాయి. యునైటెడ్ ఎయిర్‌లైన్స్ లాభాలు అంచనాలను మించడంతో ఆ షేర్లు పెరిగాయి, అయితే నెట్‌ఫ్లిక్స్ ఫలితాల ప్రకటనతో స్వల్పంగా తగ్గింది. ఇంటెల్ షేర్లు గణనీయంగా పెరిగాయి.
ట్రంప్ కొత్త ప్రకటనతో మార్కెట్లలో ప్రస్తుతానికి టెన్షన్ తగ్గినప్పటికీ, ఇన్వెస్టర్లు గ్రీన్‌ల్యాండ్ వ్యవహారాన్ని ఇంకా నిశితంగా గమనిస్తూనే ఉన్నారు.