వేళ్లు విరిచే అలవాటు ఉన్నవారిని చూసి, అలా చేయవద్దని చుట్టుపక్కల వారు హెచ్చరించడం మనం తరచుగా చూస్తుంటాం. “వేళ్లు విరిస్తే చేతులు వణుకుతాయి, కీళ్ల నొప్పులు వస్తాయి లేదా కీళ్లవాతం (Arthritis) వస్తుంది” అని చాలా మంది భయపెడుతుంటారు. ఈ అలవాటు వల్ల ఎముకలు బలహీనపడతాయని అంటుంటారు. అయితే, ఇందులో నిజమెంత ఉందో శాస్త్రీయంగా తెలుసుకుందాం…
వేళ్లు విరిచినప్పుడు శబ్దం ఎందుకు వస్తుంది? వేళ్లు లేదా కీళ్లను విరిచినప్పుడు వచ్చే శబ్దం ఎముకలు ఒకదానికొకటి రాసుకోవడం వల్ల లేదా మృదులాస్థి (Cartilage) విరగడం వల్ల రాదు. ఈ శబ్దానికి అసలు కారణం వాయువు (Gas). 2015లో జరిగిన ఒక అధ్యయనం ప్రకారం.. మనం కీళ్లను సాగదీసినప్పుడు అక్కడ ఒత్తిడి అకస్మాత్తుగా తగ్గుతుంది. దీనివల్ల కీళ్లలో కందెనలా పనిచేసే సైనోవియల్ ద్రవం (Synovial Fluid) వేగంగా వ్యాపించదు, ఫలితంగా అక్కడ వాయువుతో నిండిన చిన్న బుడగలు (Cavities) ఏర్పడతాయి. ఈ ప్రక్రియను ‘ట్రైబోన్యూక్లియేషన్’ (Tribonucleation) అంటారు. ఆ బుడగలు పగిలినప్పుడే మనకు ‘టక్’ అనే శబ్దం వినిపిస్తుంది.
ఈ అలవాటు హానికరమా? వేళ్లు విరవడం వల్ల కీళ్లవాతం వస్తుందనేది ఒక సాధారణ అపోహ మాత్రమే. దీనికి సంబంధించి ఎటువంటి శాస్త్రీయ ఆధారాలు లేవు. డొనాల్డ్ ఉంగర్ అనే వైద్యుడు తన ఎడమ చేతి వేళ్లను ఏకంగా 50 ఏళ్ల పాటు విరిచారు, కానీ కుడి చేతి వేళ్లను ఎప్పుడూ విరవలేదు. 2004లో ఆయన తన రెండు చేతులను పరీక్షించుకోగా, రెండు చేతుల కీళ్లలో ఎలాంటి తేడా లేదని, కీళ్లవాతం లక్షణాలు ఎక్కడా కనిపించలేదని తేలింది. దీనికిగాను ఆయనకు ‘ఇగ్ నోబెల్’ బహుమతి కూడా లభించింది.
అపోహలు vs వాస్తవాలు: వేళ్లు విరవడం వెనుక ఉన్న సైన్స్ గురించి సరైన అవగాహన లేకపోవడం వల్లే ఇలాంటి అపోహలు పుట్టుకొచ్చాయి. వేళ్లు విరవడం వల్ల పెద్దగా నష్టమేమీ లేదని పరిశోధనలు చెబుతున్నప్పటికీ, తప్పుడు పద్ధతిలో లేదా అతిగా వేళ్లను లాగడం వల్ల కండరాలు లేదా లిగమెంట్లకు గాయాలయ్యే ప్రమాదం ఉందని శాస్త్రవేత్తలు హెచ్చరిస్తున్నారు.