ఛత్తీస్‌గఢ్‌లోని ఉత్తర బస్తర్ కాంకేర్ జిల్లా తాడోకి పోలీస్ స్టేషన్ పరిధిలో మూఢనమ్మకాలు, నకిలీ వైద్యం పేరుతో 14 ఏళ్ల మైనర్ బాలికపై అఘాయిత్యానికి పాల్పడిన దిగ్భ్రాంతికర సంఘటన వెలుగులోకి వచ్చింది.
వైద్యుడిగా చలామణి అవుతున్న కామాంధుడు
గ్రామంలో తానొక ‘వైద్యుడిని’ అని చెప్పుకునే 44 ఏళ్ల వ్యక్తి ఈ దురాగ్యానికి పాల్పడ్డాడు. ఈ ఘటనపై బాధితురాలైన బాలిక తల్లిదండ్రులు ఇచ్చిన ఫిర్యాదు మేరకు పోలీసులు తక్షణమే స్పందించి కేసు నమోదు చేసి నిందితుడిని అరెస్ట్ చేశారు.
గత ఏడాది ఏప్రిల్‌లో బాలిక అనారోగ్యానికి గురికావడంతో ఆమె తల్లిదండ్రులు ఆమెను ఆమాగాన్ గ్రామానికి చెందిన రమేష్ కుమార్ బిస్తా అనే నాటు వైద్యుడి వద్దకు తీసుకెళ్లారు. ఆ సమయంలో బాలిక గర్భాశయంలో సమస్య ఉందని నమ్మబలికిన ఆ వ్యక్తి, ఆమెకు ఒక తాయితం ఇచ్చాడు. అంతేకాకుండా చికిత్స పేరుతో పలుమార్లు బాలికను ఆమె తల్లిదండ్రుల నుండి వేరుగా ఉంచాడు.
ఆసుపత్రిలో బయటపడిన నిజం
గత అక్టోబర్‌లో బాలిక ఆరోగ్యం మరింత క్షీణించడంతో ఆంటాగర్ ఆసుపత్రికి తీసుకెళ్లగా.. పరీక్షించిన వైద్యులు ఆ బాలిక 5 నెలల గర్భవతి అని తేల్చడంతో కుటుంబ సభ్యులు నివ్వెరపోయారు.
దీంతో భయపడిపోయిన బాలిక తనకు జరిగిన దారుణాన్ని తల్లిదండ్రులకు వివరించింది. ఆ వ్యక్తి తనకు మత్తుమందు (విషపూరిత మందు) ఇచ్చి స్పృహ కోల్పోయేలా చేసి, ఆపై అనేకసార్లు లైంగిక దాడికి పాల్పడినట్లు బాలిక తెలిపింది.
వెంటనే తాడోకి పోలీస్ స్టేషన్‌లో తల్లిదండ్రులు ఫిర్యాదు చేయడంతో.. పోక్సో చట్టం (POCSO Act) మరియు సంబంధిత సెక్షన్ల కింద కేసు నమోదు చేసిన పోలీసులు, అక్టోబర్ 19న నిందితుడు రమేష్ కుమార్ బిస్తాను అరెస్ట్ చేసి కోర్టులో హాజరుపరిచారు.
ఇలాంటి మూఢనమ్మకాలను, నకిలీ వైద్యులను నమ్మి మోసపోవద్దని, ఎలాంటి అనారోగ్య సమస్యలు తలెత్తినా అర్హత కలిగిన వైద్య నిపుణుల వద్ద మాత్రమే చికిత్స తీసుకోవాలని అధికారులు హెచ్చరిస్తున్నారు. ముఖ్యంగా పిల్లల భద్రత విషయంలో తల్లిదండ్రులు అత్యంత అప్రమత్తంగా ఉండాలని, అనుమానాస్పద వ్యక్తుల కదలికలపై నిఘా ఉంచి వెంటనే పోలీసులకు సమాచారం అందించాలని కోరుతున్నారు.
Leave a Reply