నేటి ఉరుకుల పరుగుల జీవితంలో, మారుతున్న ఆహారపు అలవాట్ల వల్ల మధుమేహం (Diabetes) అనేది అన్ని వయసుల వారిని వేధిస్తున్న సాధారణ సమస్యగా మారింది. మధుమేహ వ్యాధిగ్రస్తులు తమ ఆహారంపై ఎప్పుడూ ప్రత్యేక శ్రద్ధ వహించాలి, లేదంటే పరిస్థితి విషమించవచ్చు. ముఖ్యంగా చలికాలంలో చక్కెర స్థాయిలను అదుపులో ఉంచుకోవడం ఒక సవాలుతో కూడుకున్న పని.
ఉదయం పూట ఖాళీ కడుపుతో ఉన్నప్పుడు మనం తీసుకునే మొదటి ఆహారం రక్తంలోని చక్కెర స్థాయిలపై తక్షణ ప్రభావాన్ని చూపుతుంది. అందుకే ఉదయాన్నే వేటిని తీసుకోవాలో, వేటిని వదిలేయాలో తెలుసుకోవడం చాలా ముఖ్యం.
ఉదయాన్నే ఖాళీ కడుపుతో ఏమి తీసుకోవచ్చు?
- గోరువెచ్చని నీరు: నిద్రలేవగానే ఒక గ్లాసు గోరువెచ్చని నీటిని తాగడం వల్ల శరీర జీవక్రియ (Metabolism) మెరుగుపడుతుంది. కాఫీ, టీలకు బదులుగా నీరు లేదా ఇతర ద్రవ పదార్థాలతో రోజును ప్రారంభించడం జీర్ణాశయానికి మంచిది.
- నానబెట్టిన డ్రై ఫ్రూట్స్: రాత్రంతా నానబెట్టిన 5 బాదం పప్పులు లేదా రెండు వాల్‌నట్స్ తీసుకోవడం వల్ల శరీరానికి అవసరమైన ఆరోగ్యకరమైన కొవ్వులు అందుతాయి.
- పీచు పదార్థాలు (Fiber): మొలకెత్తిన గింజలు, చిరుధాన్యాలతో (Millets) చేసిన ఉప్మా, పొంగలి లేదా గంజి వంటివి తీసుకోవడం వల్ల చక్కెర స్థాయిలు ఒక్కసారిగా పెరగకుండా ఉంటాయి.
- సలాడ్లు: దోసకాయ మరియు పచ్చి కూరగాయల సలాడ్లు ఆకలిని నియంత్రించడమే కాకుండా శరీరాన్ని హైడ్రేటెడ్ గా ఉంచుతాయి.
- ఆరోగ్యకరమైన పానీయాలు: ఇన్సులిన్ ఉత్పత్తిని మెరుగుపరిచే ఉసిరి రసం, కాకరకాయ రసం లేదా గ్రీన్ టీ వంటివి ఖాళీ కడుపుతో తీసుకోవడం మేలు చేస్తుంది.
ఖాళీ కడుపుతో వేటిని నివారించాలి?
- చక్కెర పానీయాలు: పంచదార కలిపిన టీ, కాఫీ మరియు కృత్రిమ తీపి ఉన్న పండ్ల రసాలను పూర్తిగా పక్కన పెట్టాలి.
- మైదా ఉత్పత్తులు: మైదాతో చేసిన బిస్కెట్లు, కేకులు, వైట్ బ్రెడ్ వంటివి చక్కెర స్థాయిలను వెంటనే పెంచుతాయి.
- తీపి పదార్థాలు: బెల్లం లేదా పంచదారతో చేసిన స్వీట్లు, మిఠాయిలు ఉదయాన్నే తీసుకోకూడదు.
- అధిక తీపి ఉన్న పండ్లు: అరటిపండు, మామిడి, పనస పండు మరియు ఎండు ఖర్జూరం వంటి పండ్లలో క్యాలరీలు, చక్కెర శాతం ఎక్కువగా ఉంటాయి.
- వేపుళ్లు: ఉదయాన్నే నూనెలో వేయించిన పదార్థాలు తినడం వల్ల జీర్ణ సమస్యలు తలెత్తడమే కాకుండా చక్కెర స్థాయిలు అస్తవ్యస్తమవుతాయి.