వైరల్ న్యూస్: ఎట్టకేలకు వీడిన బార్ముడా ట్రయాంగిల్ రహస్యం! ఆ నిగూఢ ప్రాంతంలో బయటపడింది ఏంటో తెలుసా?

ప్రపంచంలోని అనేక రహస్య ప్రదేశాలలో బార్ముడా ట్రయాంగిల్‌కు ఒక ప్రత్యేక స్థానం ఉంది. దశాబ్దాలుగా ఇక్కడ విమానాలు, ఓడలు అదృశ్యం కావడం, నావికులు దిక్కుతోచక అల్లాడిపోవడం వంటి కథలు ఈ ప్రాంతంపై భయాన్ని, కుతూహలాన్ని పెంచాయి. ఇప్పుడు ఇదే బార్ముడా ట్రయాంగిల్ లోతుల్లో శాస్త్రవేత్తలను విస్మయానికి గురిచేసే ఒక అరుదైన విషయం వెలుగులోకి వచ్చింది. ఇది శతాబ్దాల నాటి రహస్యాలకు సమాధానం ఇచ్చేలా ఉంది.

ఏమిటీ బార్ముడా ట్రయాంగిల్? ఉత్తర అట్లాంటిక్ మహాసముద్రంలో మయామి, బార్ముడా మరియు ప్యూర్టో రికోల మధ్య విస్తరించి ఉన్న ప్రాంతాన్నే బార్ముడా ట్రయాంగిల్ అంటారు. ఇక్కడ ఓడలు అదృశ్యం కావడానికి గ్రహాంతర వాసులు, సముద్ర రాక్షసులు లేదా అతీంద్రియ శక్తులే కారణమని చాలా కాలంగా ప్రచారంలో ఉంది. కానీ శాస్త్రీయంగా ఇవేవీ నిరూపితం కాలేదు.

సముద్ర గర్భంలో దాగిన భారీ నిర్మాణం: ఇటీవలి పరిశోధనలో బార్ముడా ట్రయాంగిల్ అడుగు భాగంలో సుమారు 20 కిలోమీటర్ల వెడల్పు ఉన్న ఒక అసాధారణ భూగర్భ పొరను శాస్త్రవేత్తలు గుర్తించారు. మొదట్లో దీనిని ఏదో వింత జీవి అని భావించినప్పటికీ, వాస్తవానికి ఇది భూమి లోపల ఉన్న ఒక అరుదైన శిలల నిర్మాణం (Rock formation). భూమిపై మరెక్కడా ఇలాంటి నిర్మాణం లేకపోవడం శాస్త్రవేత్తలను ఆశ్చర్యానికి గురిచేస్తోంది.

భూమి పైపొర కంటే భిన్నమైన నిర్మాణం: బార్ముడా సముద్రం కింద సుమారు 20 కి.మీ మందం కలిగిన ఈ భారీ శిల, సముద్రపు పైపొర (Crust) మరియు మ్యాంటిల్ (Mantle) మధ్య ఉంది. ఇది తక్కువ సాంద్రత కలిగిన శిలలతో ఏర్పడి, చుట్టుపక్కల ప్రాంతాల కంటే సముద్ర మట్టాన్ని 500 మీటర్ల ఎత్తులో ఉంచుతోంది. సుమారు 31 మిలియన్ల ఏళ్ల క్రితం జరిగిన అగ్నిపర్వత పేలుళ్ల వల్ల ఈ నిర్మాణం ఏర్పడి ఉండవచ్చని పరిశోధకులు భావిస్తున్నారు.

భూకంప తరంగాల ద్వారా లభించిన ఆధారాలు: దూర ప్రాంతాలలో సంభవించే భూకంప తరంగాలను విశ్లేషించినప్పుడు, అవి బార్ముడా ప్రాంతం గుండా వెళ్లేటప్పుడు వాటి వేగంలో మార్పులు రావడాన్ని శాస్త్రవేత్తలు గమనించారు. దీని ద్వారా అక్కడ శిలలు సాధారణం కంటే మందంగా, తక్కువ సాంద్రతతో ఉన్నాయని స్పష్టమైంది.

స్మిత్ కాలేజీ భూవిజ్ఞాన శాస్త్రవేత్త సారా మజ్జా ప్రకారం.. ఇక్కడి లావాలో సిలికా తక్కువగా ఉండటానికి కారణం భూమి అంతర్భాగం నుండి వచ్చిన అధిక కార్బన్. సుమారు 900 నుండి 300 మిలియన్ ఏళ్ల క్రితం ‘పంగియా’ (Pangea) అనే సూపర్ కాంటినెంట్ ఏర్పడిన సమయంలో ఈ కార్బన్ భూమి లోపలికి నెట్టబడి ఉండవచ్చు.

మొత్తానికి, ఈ ఆవిష్కరణ బార్ముడా ట్రయాంగిల్ రహస్యాన్ని కట్టుకథల నుండి విజ్ఞాన శాస్త్రం వైపు మళ్లించింది. గ్రహాంతర వాసులు కాకుండా, భూమి లోపల జరిగే అరుదైన భౌగోళిక మార్పులే ఈ ప్రాంతం యొక్క అసాధారణతకు కారణమని ఇప్పుడు స్పష్టమవుతోంది.