సివిల్ సర్వీసెస్ ఫలితాలు విడుదలైన కొద్ది రోజులకే దేశవ్యాప్తంగా నిజమైన విజేతలకు సన్మానాలు జరుగుతుంటే, బీహార్‌లోని షేక్‌పురాలో ఒక ‘నకిలీ ఐఏఎస్’ వెలుగులోకి వచ్చాడు. రంజిత్ యాదవ్ అనే దినసరి కూలీ, తాను యూపీఎస్సీలో 440వ ర్యాంకు సాధించానని నమ్మబలికి అందరినీ బురిడీ కొట్టించాడు.
ఎమ్మెల్యే సన్మానం – నగదు బహుమతులు:
రంజిత్ యాదవ్ విజయం సాధించాడని నమ్మిన స్థానిక ఆర్జేడీ (RJD) ఎమ్మెల్యే విజయ్ కుమార్, అతని ఇంటికి వెళ్లి మరీ ఘనంగా సన్మానం చేశారు. దీనికి సంబంధించిన వీడియో సోషల్ మీడియాలో వైరల్ అవుతోంది. ఈ సందర్భంగా ఎమ్మెల్యే అతనికి పూలమాలలు వేసి, ఒక వీఐపీ సూట్‌కేస్ మరియు కొంత నగదును గౌరవ సూచికంగా అందజేశారు. ఆ నకిలీ టాపర్ ఏమాత్రం తడబడకుండా ఆ బహుమతులను స్వీకరించడం గమనార్హం.
నకిలీ ఐఏఎస్ ‘కిడ్నీ తాకే’ మోటివేషన్:
సన్మాన కార్యక్రమంలో రంజిత్ యాదవ్ ఏకంగా ఒక గంట పాటు మోటివేషనల్ స్పీచ్ ఇచ్చాడు. “లక్ష్యంపై దృష్టి పెడితే ఏదైనా సాధించవచ్చు” అంటూ అతను ఇస్తున్న లెక్చర్‌కు స్థానికులు చప్పట్లతో హోరెత్తించారు. నెటిజన్లు దీనిని ‘కిడ్నీ టచింగ్ గ్యాన్’ (మనసును హత్తుకునే జ్ఞానం) అంటూ ఎగతాళి చేస్తున్నారు.
పోలీసుల విచారణలో వెలుగులోకి..
మరో వీడియోలో స్థానిక పోలీస్ స్టేషన్ హౌస్ ఆఫీసర్ (SHO), రంజిత్‌ను ఇంటర్వ్యూ చేయడం కనిపించింది. అందులో అతను తన కష్టాలను, పేదరికాన్ని జయించి ఎలా ఈ స్థాయికి వచ్చాడో కథలు కథలుగా చెప్పాడు. అయితే, తీరా యూపీఎస్సీ జాబితాను నిశితంగా పరిశీలిస్తే, అతని పేరు ఎక్కడా లేకపోవడంతో అసలు విషయం బయటపడింది.
నెటిజన్ల రియాక్షన్:
అతని మోసం బయటపడగానే సోషల్ మీడియాలో ట్రోల్స్ మొదలయ్యాయి.
“ఇతనికి యూపీఎస్సీ గౌరవప్రదంగా ‘420’ ర్యాంకు ఇవ్వాలి” అని ఒక యూజర్ కామెంట్ చేయగా..
“ఎమ్మెల్యే స్థాయి వ్యక్తి కూడా కనీసం నిజనిర్ధారణ చేసుకోకుండా ఎలా బహుమతులు ఇస్తారు?” అని మరికొందరు ప్రశ్నిస్తున్నారు.
ప్రస్తుతం పోలీసులు ఆ నకిలీ టాపర్ ఇచ్చిన నగదు మరియు బహుమతులను రికవరీ చేసే పనిలో ఉన్నారు.