తమిళనాడు: కడలూరు జిల్లాలో జరిగిన ఒక దురదృష్టకర ఘటనలో వ్యవసాయ కళాశాల ప్రొఫెసర్ ఒకరు కందిరీగల (Hornet) దాడిలో మరణించారు.
అసలేం జరిగింది? కడలూరు జిల్లా పన్రుట్టి సమీపంలోని బాబుకుళం ప్రాంతంలో వ్యవసాయ కళాశాల విద్యార్థుల కోసం కీటక శాస్త్రం (Entomology) మరియు తేనెటీగల పెంపకంపై ఒక ప్రయోగాత్మక తరగతి (Practical Class) నిర్వహిస్తున్నారు. రాణిపేట జిల్లాలోని ఒక ప్రైవేట్ వ్యవసాయ కళాశాలకు చెందిన 18 మంది ఫైనల్ ఇయర్ విద్యార్థులు, తమ ఫీల్డ్ రీసెర్చ్ మరియు శిక్షణ కోసం పన్రుట్టికి వచ్చారు. కీటక శాస్త్ర ప్రొఫెసర్ సురేష్ విద్యార్థులకు తేనెటీగల పెంపకం, కీటకాల ఆవాసాల గురించి క్షేత్రస్థాయిలో వివరిస్తుండగా ఈ ప్రమాదం జరిగింది.
అకస్మాత్తుగా దాడి: ఆ సమయంలో, సమీపంలోని ఒక చెట్టుపై ఉన్న వందలాది విషపూరితమైన కందిరీగలు ఒక్కసారిగా ప్రొఫెసర్ మరియు విద్యార్థులపై దాడి చేశాయి. వాటి దాడి తీవ్రంగా ఉండటంతో అందరూ ప్రాణభయంతో పరుగులు తీశారు. స్థానికులు వెంటనే స్పందించి, బాధితులను పన్రుట్టి ప్రభుత్వ ఆసుపత్రికి తరలించారు.
ప్రొఫెసర్ మృతి: శరీరంలోకి కందిరీగల విషం వేగంగా వ్యాపించడంతో, చికిత్స పొందుతూ ప్రొఫెసర్ సురేష్ మరణించారు. విద్యార్థులకు కీటకాల గురించి బోధించే ప్రొఫెసరే కీటకాల దాడిలో మరణించడం పట్ల తోటి అధ్యాపకులు, కుటుంబ సభ్యులు తీవ్ర విషాదంలో ఉన్నారు. గాయపడిన 18 మంది విద్యార్థులు ప్రస్తుతం ఆసుపత్రిలో చికిత్స పొందుతున్నారు. ఈ ఘటనపై పోలీసులు, అటవీశాఖ అధికారులు కేసు నమోదు చేశారు. ఆ ప్రాంతంలో ప్రజల రాకపోకలను నియంత్రించి, కందిరీగల గూళ్లను తొలగించేందుకు అధికారులు చర్యలు తీసుకుంటున్నారు.