చాలామంది సాయంత్రం వేళల్లో చీకటి పడగానే శరీర మెటబాలిజం (జీవక్రియ) మందగిస్తుందని భావిస్తారు. కానీ వాస్తవం ఏమిటంటే, రాత్రి సమయంలో శరీర పనితీరులో కొన్ని మార్పులు వస్తాయి మరియు మన అలవాట్లు ఆ ప్రక్రియను మరింత నెమ్మదింపజేస్తాయి. మెటబాలిజం అనేది మనం తిన్న ఆహారాన్ని జీర్ణం చేసి శక్తిగా మార్చే ప్రక్రియ.
పగటిపూట ప్రజలు అధిక శ్రమతో ఉండటం వల్ల శరీరం ఎక్కువ క్యాలరీలను ఖర్చు చేస్తుంది. రాత్రిపూట విశ్రాంతి తీసుకునేటప్పుడు శరీర అవసరాలు తగ్గుతాయి, తద్వారా మెటబాలిజం కూడా స్వల్పంగా తగ్గుతుంది. ఇది సహజమైన ప్రక్రియే, కానీ మన ఆహారపు అలవాట్లు ఆరోగ్యకరంగా లేనప్పుడు అసలు సమస్య మొదలవుతుంది. రాత్రి సమయం బరువు పెరగడానికి కారణం కాదు; మన జీవనశైలే దానికి బాధ్యత.
1. జంక్ ఫుడ్స్ / ఫాస్ట్ ఫుడ్స్
మెటబాలిజం నెమ్మదించడానికి ప్రధాన కారణం రాత్రిపూట ఆలస్యంగా నిద్రపోతూ జంక్ ఫుడ్స్ తినడం. నిద్రపోయే ముందు వేయించిన (Fried) లేదా తీపి పదార్థాలు తింటే శరీరం వాటిని సరిగ్గా జీర్ణం చేయలేదు. ఇది కొవ్వు పేరుకుపోవడానికి మరియు బరువు పెరగడానికి దారితీస్తుంది. చిప్స్, స్వీట్లు లేదా కూల్ డ్రింక్స్ క్యాలరీలను పెంచుతాయి. ఇవి మరుసటి రోజు గ్యాస్ మరియు కడుపు ఉబ్బరానికి కూడా కారణమవుతాయి.
2. నిద్రలేమి
కొవ్వు పెరగడానికి నిద్రలేమి కూడా ఒక ముఖ్య కారణం. నిద్ర సరిగ్గా లేకపోతే హార్మోన్ల అసమతుల్యత ఏర్పడి ఆకలి పెరుగుతుంది. ఎక్కువ సేపు మొబైల్ వాడటం, సరైన సమయానికి నిద్రపోకపోవడం మెటబాలిజంపై ప్రభావం చూపుతుంది. శరీరానికి తగిన విశ్రాంతి దొరకనప్పుడు బరువు క్రమంగా పెరుగుతుంది. నైట్ షిఫ్టుల్లో పనిచేసే వారిలో ఈ సమస్య ఎక్కువగా కనిపిస్తుంది.
3. శారీరక శ్రమ లేకపోవడం
రోజంతా కూర్చుని పనిచేసి, రాత్రి భోజనం చేసిన వెంటనే పడుకోవడం వల్ల క్యాలరీలు ఖర్చు కావు. ఇది మెటబాలిజంను తగ్గిస్తుంది. అందుకే భోజనం తర్వాత చిన్నపాటి నడక (Brisk walking) లేదా శరీరాన్ని సాగదీయడం (Stretching) వంటివి చేయడం మంచిది.
ఆరోగ్యకరమైన అలవాట్లు:
- రాత్రిపూట తేలికపాటి ఆహారం తీసుకోవాలి.
- నిద్రపోవడానికి కనీసం రెండు గంటల ముందే భోజనం ముగించాలి.
- రాత్రి వేళల్లో మితిమీరిన స్వీట్లు లేదా వేయించిన పదార్థాలను నివారించాలి.
- ప్రతిరోజూ 7 నుండి 8 గంటల నిద్ర తప్పనిసరి.