గ్రాము బంగారం ధర కేవలం రూ. 181 నుండి రూ. 200 అంటే మీరు నమ్ముతారా? ఇది చదవగానే ఎవరో జోక్ చేస్తున్నారని అనిపించవచ్చు. అక్షరాలా నిజం.. ఒక లీటర్ పాలు లేదా బ్రెడ్ ప్యాకెట్ ధరతో సమానంగా, చివరికి కోడిగుడ్ల ధర కంటే తక్కువకే అక్కడ బంగారం లభిస్తోంది. ఇంతకీ ఆ దేశం ఏది? అక్కడ బంగారం ధరలు ఎందుకు పాతాళానికి పడిపోయాయి? ఆ వివరాలు మీకోసం..
భారత్‌లో భగ్గుమంటున్న ధరలు.. అక్కడ మాత్రం కారుచౌక!
మన దేశంలో పసిడి ధరలు ఆకాశాన్ని తాకుతున్నాయి. తాజాగా చెన్నైలో ఒక సవరం (8 గ్రాములు) ఆభరణాల బంగారం ధర రూ. 1,12,000 మార్కును చేరింది. గ్రాము బంగారం ధర సుమారు రూ. 13,885 పలుకుతోంది. గత ఆరు నెలల్లోనే బంగారం ధరలు లక్ష రూపాయల మైలురాయిని దాటేశాయి. దీంతో సామాన్యులు బంగారం కొనాలంటేనే భయపడిపోతున్నారు.
కానీ, దక్షిణ అమెరికా ఖండంలోని వెనిజులా దేశంలో పరిస్థితి ఇందుకు భిన్నంగా ఉంది. ఇక్కడ బంగారం ధరలు వింటే నోరెళ్లబెట్టాల్సిందే.
గుడ్డు కంటే బంగారం చౌక!
వెనిజులాలో ఈ ఏడాది ఆరంభం నుంచి 24 క్యారెట్ల గ్రాము బంగారం ధర రూ. 181 నుండి రూ. 200 మధ్యే ఉంది. అంటే కేవలం 2000 రూపాయలు ఇస్తే 10 గ్రాముల బంగారాన్ని మీ సొంతం చేసుకోవచ్చు. అదే మన దేశంలో ఒక గ్రాము బంగారం ధర (రూ. 13,800) వెనిజులాలో ఇస్తే.. ఏకంగా 69 గ్రాముల బంగారాన్ని కొనుగోలు చేయవచ్చు.
అక్కడి నిత్యావసర ధరలతో పోలిస్తే ఇది మరీ విచిత్రంగా ఉంటుంది. వెనిజులాలో:
- లీటర్ పాలు: రూ. 175
- బ్రెడ్ ప్యాకెట్: రూ. 170
- డజన్ కోడిగుడ్లు: రూ. 233 గమనించారా? 12 కోడిగుడ్ల ధర కంటే ఒక గ్రాము బంగారం ధరే తక్కువగా ఉంది!
ఎందుకీ దుస్థితి?
బంగారం ఇంత తక్కువ ధరకు దొరుకుతోంది కదా అని వెనిజులా ఆర్థికంగా చాలా బలంగా ఉందని అనుకుంటే పొరపాటే. నిజానికి ఆ దేశం అత్యంత ఘోరమైన ఆర్థిక సంక్షోభంలో కొట్టుమిట్టాడుతోంది. వెనిజులా కరెన్సీ ‘బొలివర్’ (Bolivar) విలువ పాతాళానికి పడిపోయింది. అమెరికన్ డాలర్‌తో పోలిస్తే బొలివర్ విలువ 473.36 VES గా ఉంది.
అక్కడ ద్రవ్యోల్బణం (Inflation) ఎంతలా పెరిగిందంటే.. ప్రజలకు బంగారం కంటే తిండి దొరకడమే కష్టంగా మారింది. ప్రజలు ఆహారం, నిత్యావసరాల మీద పెట్టిన శ్రద్ధ బంగారంపై పెట్టడం లేదు. దీంతో బంగారం ధరలు పడిపోయి, ఆహార పదార్థాల ధరలు ఆకాశాన్నంటాయి.
సంపన్న దేశం ఎలా పతనమైంది?
వెనిజులా ప్రపంచంలోనే అత్యధిక ముడి చమురు నిల్వలు ఉన్న దేశం. అంతేకాదు, అక్కడి ఒరినోకో గనుల్లో సుమారు 8 వేల టన్నుల బంగారం నిల్వలు ఉన్నాయని అంచనా. కానీ రాజకీయ అస్థిరత ఆ దేశాన్ని ముంచేసింది.
- మాజీ అధ్యక్షుడు నికోలస్ మదురోపై ప్రజలు పెద్ద ఎత్తున తిరుగుబాటు చేశారు.
- డ్రగ్స్ స్మగ్లింగ్ ఆరోపణలపై ఈ ఏడాది జనవరి 3న అమెరికా అధ్యక్షుడు డొనాల్డ్ ట్రంప్ తన ప్రత్యేక దళాలను పంపి మదురోను, ఆయన భార్య సిలియా ఫ్లోరెస్‌ను అరెస్ట్ చేయించి అమెరికా జైలుకు తరలించారు.
ఈ రాజకీయ సంక్షోభం, పెరిగిన డ్రగ్స్ మాఫియా, ఆర్థిక లోపాలు వెనిజులాను ఒకనాడు సంపన్న దేశం నుంచి నేడు ఆహారం కోసం బంగారం అమ్ముకోవాల్సిన దౌర్భాగ్య స్థితికి దిగజార్చాయి.