తెలంగాణ రాష్ట్రం హైదరాబాద్లో, శరీర బరువు పెరగాలని భర్త బలవంతం చేయడంతో భార్య ఇల్లు వదిలి వెళ్లిన వింత ఘటన వెలుగులోకి వచ్చింది.
వివరాల్లోకి వెళ్తే.. కూకట్పల్లి ప్రాంతానికి చెందిన దంపతులకు వివాహమై మూడేళ్లు అవుతోంది. అయితే, తన భార్య చాలా సన్నగా ఉండటం భర్తకు నచ్చేది కాదు. సోషల్ మీడియాలో బరువు పెరిగే మార్గాల కోసం వెతికిన భర్త, పెరుగు తింటే బరువు పెరుగుతారని తెలుసుకున్నాడు. దీంతో తన భార్యను ప్రతిరోజూ పెరుగు తినమని బలవంతం చేసేవాడు.
నిజానికి ఆ మహిళకు పాలు, పెరుగు వంటి పదార్థాలు అంటే అస్సలు ఇష్టం ఉండదు. ఈ విషయంలో దంపతుల మధ్య తరచూ గొడవలు జరుగుతుండేవి. ఈ క్రమంలోనే, భర్త ఆఫీసుకి వెళ్లిన సమయంలో భార్య అకస్మాత్తుగా మాయమైంది. ఆమె కోసం పలు చోట్ల వెతికిన భర్త, చివరకు ఎక్కడా ఆచూకీ దొరక్కపోవడంతో పోలీసులకు ఫిర్యాదు చేశాడు.
“పెరుగు తినమన్నందుకే నా భార్య కోపంతో ఇల్లు వదిలి వెళ్లిపోయింది” అని భర్త పోలీసుల వద్ద ఆవేదన వ్యక్తం చేయడం స్థానికంగా చర్చనీయాంశమైంది. ప్రస్తుతం పోలీసులు కేసు నమోదు చేసి గాలింపు చర్యలు చేపట్టారు.