జయశంకర్ భూపాలపల్లి: హాస్టల్ వార్డెన్ ఒకరు విద్యార్థిని పట్ల అత్యంత క్రూరంగా ప్రవర్తించారు. జిల్లా కేంద్రంలోని ఎస్సీ బాలికల హాస్టల్‌లో వార్డెన్ భవాని ఒక విద్యార్థినిని దారుణంగా కొట్టిన ఘటన ఆలస్యంగా వెలుగులోకి వచ్చింది.
అసలేం జరిగింది?
హాస్టల్ వార్డెన్ భవాని, డిగ్రీ మూడవ సంవత్సరం చదువుతున్న ఒక విద్యార్థినిని కర్రతో మరియు చేతులతో ఇష్టానుసారంగా కొట్టారు. ఈ అమానుష ఘటనను అక్కడే ఉన్న ఇతర విద్యార్థినులు తమ ఫోన్లలో చిత్రీకరించారు. గత నెల 24వ తేదీన జరిగిన ఈ సంఘటన, సోషల్ మీడియాలో వీడియో వైరల్ కావడంతో ఇప్పుడు బయటపడింది.
వీడియోలో వార్డెన్ ఆ విద్యార్థినిని ఒక చోట నిలబెట్టి, కనికరం లేకుండా కర్రతో బాదడం, చెంపదెబ్బలు కొట్టడం స్పష్టంగా కనిపిస్తోంది. ప్రస్తుతం ఈ వీడియో సామాజిక మాధ్యమాల్లో తీవ్ర చర్చనీయాంశమైంది.
వివాదాలకు నిలయంగా వార్డెన్:
సదరు వార్డెన్ భవాని గతంలోనూ వార్తల్లో నిలిచారు. రెండు నెలల క్రితం ఇదే ఎస్సీ హాస్టల్‌లో విద్యార్థినులకు మతపరమైన బోధనలు చేశారనే ఆరోపణలతో ఆమెపై విమర్శలు వచ్చాయి. తాజా ఘటనతో విద్యార్థి సంఘాలు ఆగ్రహం వ్యక్తం చేస్తున్నాయి.
బాధ్యతారాహిత్యంగా ప్రవర్తించిన వార్డెన్‌పై కఠిన చర్యలు తీసుకోవాలని డిమాండ్ చేస్తూ విద్యార్థి సంఘాలు హాస్టల్ ముందు ధర్నాకు దిగాయి. అధికారులు స్పందించి ఆమెను వెంటనే విధుల నుంచి తొలగించాలని కోరుతున్నారు.