ప్లాస్టిక్ కాలుష్యం వల్ల ఎదురయ్యే ప్రమాదాలను ప్రపంచానికి చాటిచెప్పడానికి పుదుచ్చేరికి చెందిన ఒక 11 ఏళ్ల బాలిక ఎంచుకున్న మార్గం అందరినీ ఆశ్చర్యపరుస్తోంది. మైక్ పట్టుకుని ఉపన్యాసాలు ఇవ్వకుండా, ఏకంగా సముద్ర గర్భంలో 20 అడుగుల లోతుకు వెళ్లి భరతనాట్యం చేయడం ద్వారా పర్యావరణ పరిరక్షణ సందేశాన్ని అందించింది. దీనికి సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.
సాహసానికి కళ తోడైతే.. సుశిక్షితురాలైన భరతనాట్య కళాకారిణి మరియు స్కూబా డ్రైవర్ అయిన తారగై ఆరాధన, సంప్రదాయ దుస్తులు, నగలు మరియు మేకప్‌తో సముద్రం కింద నృత్యం చేసింది. కళ, సామాజిక స్పృహ మరియు ధైర్యాన్ని మేళవించి ఆమె చేసిన ఈ ప్రయత్నం ఒక అరుదైన మరియు అద్భుతమైన దృశ్యంగా నిలిచింది.
ఈ వీడియోను ఇన్‌స్టాగ్రామ్‌లో శుభమ్ భరద్వాజ్ తన ఖాతాలో పోస్ట్ చేస్తూ.. “తారగై ఆరాధన తన నృత్యాన్ని సముద్ర సంరక్షణ మిషన్‌గా మార్చిన బాలిక” అని పేర్కొన్నారు. నీటి అడుగున మాటలు లేదా సంగీతం వినిపించకపోయినప్పటికీ, ఆరాధన కేవలం తన ముఖ కవళికలు మరియు హావభావాల ద్వారా ప్లాస్టిక్ వ్యర్థాల వల్ల సముద్ర జీవులకు కలిగే నష్టాన్ని కళ్లకు కట్టారు.
ఆ స్పూర్తి ఎక్కడిది? ఆరాధన ఈ సాహసానికి పూనుకోవడానికి గల కారణాన్ని భరద్వాజ్ వివరించారు. ఒకసారి ఆరాధన సముద్ర గర్భంలోకి వెళ్లినప్పుడు, చేపల వేట వలల్లో తాబేళ్లు చిక్కుకుని ప్రాణాపాయ స్థితిలో ఉండటాన్ని గమనించింది. ఆ దృశ్యం ఆమెను తీవ్రంగా కలిచివేసింది. అప్పటి నుండి సముద్రాన్ని రక్షించడానికి ఆమె నడుం బిగించింది. ఇప్పటివరకు ఆమె దాదాపు 3,000 కిలోల ప్లాస్టిక్ వ్యర్థాలను సముద్రం నుండి తొలగించడంలో సహాయపడింది. ఆమె తండ్రి కూడా గత 18 ఏళ్లుగా ఇదే పనిలో ఉంటూ సుమారు 37,000 కిలోల సముద్ర వ్యర్థాలను క్లీన్ చేశారు.
నెటిజన్ల ప్రశంసలు: ఈ వీడియో వైరల్ కావడంతో నెటిజన్లు ఆ బాలికపై ప్రశంసల వర్షం కురిపిస్తున్నారు.
- ఒక యూజర్ స్పందిస్తూ.. “ఇంతటి గొప్ప మనసు, ధైర్యం ఉన్న బిడ్డను పెంచిన తల్లిదండ్రులకు నా సెల్యూట్” అని వ్యాఖ్యానించారు.
- “ఆమె ప్రతిభను, సందేశాన్ని మనందరం గౌరవించాలి” అని మరొకరు పేర్కొన్నారు.
- “భారతదేశానికి ఇలాంటి వారు మరికొందరు అవసరం” అని ఇంకొకరు కొనియాడారు.