ఢిల్లీ: కొన్ని హోటళ్లు కస్టమర్లను బలవంతం చేస్తూ సర్వీస్ ఛార్జీలు వసూలు చేస్తున్న నేపథ్యంలో, ఇది పూర్తిగా చట్టవిరుద్ధమని కేంద్ర ప్రభుత్వం స్పష్టం చేసింది.
కోర్టు ఉత్తర్వులు, మార్గదర్శకాలు ఉన్నప్పటికీ కొన్ని హోటళ్లు విచక్షణారహితంగా సర్వీస్ ఛార్జీలు వసూలు చేస్తున్నాయని, అటువంటి వారిపై చర్యలు తీసుకున్నట్లు వినియోగదారుల వ్యవహారాల మంత్రిత్వ శాఖ తెలిపింది. సాధారణంగా చాలా హోటళ్లు బిల్లు మొత్తంలో 10% అదనంగా ‘సర్వీస్ ఛార్జ్’ పేరుతో వసూలు చేస్తున్నాయి.
నిబంధనలు ఏం చెబుతున్నాయి? సర్వీస్ ఛార్జ్ అనేది పూర్తిగా ఐచ్ఛికం (Optional) మాత్రమే. అంటే కస్టమర్లకు ఇష్టముంటేనే ఇవ్వవచ్చు. సర్వీస్ ఛార్జ్ కట్టడం ఇష్టం లేని వారిని బలవంతం చేయకూడదు. ఈ విషయంలో ‘బార్బెక్యూ నేషన్’ (Barbeque Nation) వంటి ప్రముఖ హోటల్ చైన్ కస్టమర్ల నుండి అదనపు వసూళ్లు చేయడాన్ని కేంద్రం తప్పుబట్టింది. అదనంగా వసూలు చేసిన మొత్తాన్ని వెంటనే తొలగించాలని ఆదేశించింది.
చట్టం ప్రకారం నిబంధనలు: వినియోగదారుల రక్షణ చట్టం 2019 ప్రకారం, సెంట్రల్ కన్స్యూమర్ ప్రొటెక్షన్ అథారిటీ (CCPA) ఈ క్రింది మార్గదర్శకాలను జారీ చేసింది:
- హోటళ్లు/రెస్టారెంట్లు బిల్లులో సర్వీస్ ఛార్జీని ఆటోమేటిక్‌గా చేర్చకూడదు.
- వేరే ఏ ఇతర పేరుతోనూ ఈ ఛార్జీని బలవంతంగా వసూలు చేయకూడదు.
- సర్వీస్ ఛార్జ్ చెల్లించడానికి నిరాకరించినందుకు కస్టమర్‌కు సేవలను (Food/Service) నిరాకరించకూడదు.
- ఈ చట్టవిరుద్ధమైన ఛార్జీలపై జీఎస్టీ (GST) విధించకూడదు.
తీసుకున్న చర్యలు: బలవంతంగా సర్వీస్ ఛార్జ్ వసూలు చేసినందుకు గాను 27 హోటళ్లపై CCPA జరిమానా విధించింది. మార్చి 2025లో బార్బెక్యూ నేషన్ హోటల్‌లో ఒక కస్టమర్ నుండి ₹335 అదనంగా వసూలు చేయగా, ఆ మొత్తాన్ని తిరిగి చెల్లించాలని ప్రభుత్వం ఆదేశించింది. భవిష్యత్తులో ఇలాంటి పొరపాట్లు చేయబోమని సదరు సంస్థ హామీ ఇచ్చింది.
ఫిర్యాదు చేయడం ఎలా? హోటల్‌లో మీరు తిన్న ఆహారానికి బిల్లు కడితే చాలు, అదనపు సర్వీస్ ఛార్జ్ కట్టాల్సిన అవసరం లేదు. ఇది మీరు ఇచ్చే ‘టిప్స్’ లాంటిది మాత్రమే. ఒకవేళ ఏదైనా హోటల్ మిమ్మల్ని సర్వీస్ ఛార్జ్ కట్టాలని బలవంతం చేస్తే, మీరు వెంటనే 1915 అనే జాతీయ వినియోగదారుల హెల్ప్‌లైన్ నంబర్‌కు కాల్ చేసి ఫిర్యాదు చేయవచ్చు!