ఒకప్పుడు కళాకారులు కేవలం తమ కళపైనే ఆధారపడి జీవించేవారు. కానీ ఇప్పుడు కాలం మారింది. నేడు సినీ రంగంలో సాంకేతిక నిపుణులు, కార్మికులు తప్ప, స్టార్లు ఎవరూ కేవలం సినిమాలపైనే ఆధారపడటం లేదు. ప్రతి ఒక్కరూ ఏదో ఒక వ్యాపారంలో పెట్టుబడి పెట్టి సంపాదన మార్గాలను వెతుక్కుంటున్నారు.
కొందరు దుస్తుల వ్యాపారం చేస్తుంటే, మరికొందరు మేకప్ కిట్లు అమ్ముతున్నారు. కొందరు సినిమాలు నిర్మిస్తుంటే, ఇంకొందరు సొంతంగా మద్యం బ్రాండ్లు మొదలుపెట్టారు. మరికొందరు రియల్ ఎస్టేట్, హోటల్ రంగాల్లోకి అడుగుపెట్టారు. కేవలం నటులే కాదు, వారి కుటుంబ సభ్యులు కూడా ఈ వ్యాపారాల్లో భాగస్వాములవుతున్నారు. ఆ జాబితాలో సల్మాన్ ఖాన్ సోదరి అర్పితా ఖాన్ కూడా ఒకరు.
సల్మాన్ ఖాన్ గారాల పట్టి అర్పితా ఖాన్, ఆయుష్ శర్మను వివాహం చేసుకుని వ్యాపారవేత్తగా రాణిస్తున్నారు. ముంబైలోని శాంతాక్రూజ్లో ఆమెకు ”మెర్సీ” (Mersi) అనే అత్యంత విలాసవంతమైన రెస్టారెంట్ ఉంది.
రెండేళ్ల క్రితం ప్రారంభమైన ఈ 9,000 చదరపు అడుగుల వైభోగవంతమైన రెస్టారెంట్కు మధ్యతరగతి వారు వెళ్తే జేబు ఖాళీ అవ్వడం ఖాయం. ప్రస్తుతం సోషల్ మీడియాలో వైరల్ అవుతున్న ఈ రెస్టారెంట్ మెనూ కార్డు చూస్తే ఎవరైనా కళ్ళు తేలేయాల్సిందే.
షాకింగ్ ధరలు ఇవే:
- యూరోపియన్ పాస్తా: ఒక ప్లేట్ ధర ₹5,000.
- ట్రఫుల్ పాస్తా ఆన్ వీల్: దీని ధర అక్షరాలా ₹8,500. సాధారణంగా ఇతర రెస్టారెంట్లలో ఇది ₹500 నుండి ₹1,200 మధ్యలో దొరుకుతుంది.
- ల్యాంబ్ లోయిన్ (గొర్రె మాంసం వంటకం): దీని ధర ₹10,000.
- హర్బ్ క్రస్టెడ్ ల్యాంబ్ లోయిన్: ఇది కూడా ₹10,000 పలుకుతోంది.
- టెరియాకి సాల్మన్ (జపనీస్ చేప వంటకం): దీని ధర ₹4,000.
మద్యం ధరల విషయానికి వస్తే, ఇక్కడ ఒక బాటిల్ ”డోమ్ పెరిగ్నాన్ రోజ్” షాంపైన్ ధర ₹2,00,000. సిగ్నేచర్ కాక్టెయిల్స్ ధరలు ₹1,500 నుండి మొదలవుతాయి. కేవలం 30ml/60ml ప్రీమియం మద్యం ధర ₹2,000 నుండి ₹5,000 వరకు ఉంది.
సోషల్ మీడియాలో ట్రోల్స్:
ఈ ధరలను చూసి నెటిజన్లు రకరకాలుగా స్పందిస్తున్నారు. “ఈ పాస్తా తింటే నేరుగా స్వర్గానికి వెళ్తారా?” అని కొందరు, “ఇక్కడ ఆర్డర్ ఇవ్వాలంటే పర్సనల్ లోన్ తీసుకోవాలి” అని మరికొందరు కామెంట్ చేస్తున్నారు. ఇంత రేట్లు చూశాక ఈ రెస్టారెంట్ పేరు ‘మెర్సీ’ (కరుణ) కాకుండా ‘నో మెర్సీ’ (కరుణ లేనిది) అని పెట్టాల్సింది అని ఎద్దేవా చేస్తున్నారు. మరికొందరైతే “ఒకవేళ సల్మాన్ ఖానే స్వయంగా ఇక్కడ సర్వర్గా పనిచేస్తున్నారా ఏంటి?” అని జోకులు పేల్చుతున్నారు.