సింగపూర్ మీదుగా ప్రయాణించే భారతీయ ప్రయాణికులకు ఆ దేశ ప్రభుత్వం ఒక శుభవార్త అందించింది. సింగపూర్ ప్రవేశపెట్టిన 96-గంటల వీసా రహిత రవాణా సదుపాయం (VFTF) ద్వారా, మీరు వీసా లేకుండానే ఆ దేశాన్ని సందర్శించవచ్చు. ఈ పథకం కింద, సింగపూర్ మీదుగా మరో దేశానికి వెళ్లే ప్రయాణికులు గరిష్టంగా 96 గంటల పాటు (4 రోజులు) సింగపూర్‌లో బస చేసే అవకాశాన్ని కల్పిస్తుంది.
ఈ పథకం ఒక దేశం నుండి మరొక దేశానికి వెళ్లే ట్రాన్సిట్ (Transit) ప్రయాణికుల కోసం ప్రత్యేకంగా రూపొందించబడింది. భారతదేశంతో పాటు చైనా, CIS దేశాలు, జార్జియా, తుర్క్మెనిస్తాన్ మరియు ఉక్రెయిన్ పౌరులు ఈ సదుపాయాన్ని ఉపయోగించుకోవచ్చు. అయితే, ఈ అనుమతి ఆటోమేటిక్‌గా లభించదు; ఇది సింగపూర్ ఇమ్మిగ్రేషన్ అండ్ చెక్ పాయింట్స్ అథారిటీ (ICA) ఆమోదానికి లోబడి ఉంటుంది.
భారతీయ పాస్‌పోర్ట్ ఉన్నవారికి నిబంధనలు:
- సింగపూర్ మీ ప్రయాణంలో ఒక స్టాప్‌ఓవర్ (Stopover) మాత్రమే అయి ఉండాలి. అంటే మీరు సింగపూర్ మీదుగా మరో దేశానికి వెళ్లేవారై ఉండాలి.
- మీరు ఏ మార్గం ద్వారా అయినా (విమానం/ఓడ/రోడ్డు) సింగపూర్‌లోకి ప్రవేశించవచ్చు, కానీ 96 గంటలలోపు విమానం లేదా సముద్ర మార్గం ద్వారా మాత్రమే బయటకు వెళ్లాలి.
- భారతీయ ప్రయాణికులు అమెరికా (USA), బ్రిటన్ (UK), కెనడా, జపాన్, ఆస్ట్రేలియా, న్యూజిలాండ్, జర్మనీ లేదా స్విట్జర్లాండ్ వంటి దేశాల్లో ఏదో ఒకదానికి సంబంధించిన చెల్లుబాటు అయ్యే వీసా లేదా లాంగ్-టర్మ్ పాస్‌ను కలిగి ఉండాలి. ఈ వీసా సింగపూర్‌లో దిగిన తేదీ నుండి కనీసం ఒక నెల పాటు చెల్లుబాటులో ఉండాలి.
- విమానాశ్రయం ఇమ్మిగ్రేషన్ దాటి బయటకు వచ్చి మీ లగేజీ తీసుకోవాలన్నా లేదా మళ్లీ చెక్-ఇన్ చేయాలన్నా ఈ VFTF సదుపాయం మీకు ఖచ్చితంగా ఉండాలి.
ప్రయాణానికి ముందే మీ ఎయిర్‌లైన్స్ సంస్థతో మాట్లాడి మరిన్ని వివరాలు తెలుసుకోవడం మంచిది. అనుమతిపై తుది నిర్ణయం అక్కడి ఇమ్మిగ్రేషన్ అధికారులదే ఉంటుంది.