సినిమాను మించిన పార్కింగ్ వివాదం..! “ఒక కుటుంబయాన్నే నాశనం చేశాడు…” పట్టపగలే ముగ్గురిని వరుసగా కాల్చి చంపిన దారుణం! నేవీ మాజీ అధికారి ఉన్మాదం… వణికించే నిజం!

ఉత్తరప్రదేశ్ రాష్ట్రంలోని లక్నోలో కార్ పార్కింగ్ విషయంలో తలెత్తిన వివాదంలో ఒకే కుటుంబానికి చెందిన ముగ్గురు వ్యక్తులు పట్టపగలే కాల్చి చంపబడటం తీవ్ర కలకలం రేపింది.

నౌబస్తా ప్రాంతంలోని బ్రాహ్మణ తోలాలో సోమవారం ఉదయం సుమారు 10:30 గంటల ప్రాంతంలో ఈ ఘోర సంఘటన జరిగింది. ఈ దాడిలో శివాజీ తివారీ, ఆయన కుమారుడు సుయష్ తివారీ, ఆయన సోదరుడు శివేంద్ర తివారీ అలియాస్ శంభూ అనే ముగ్గురు వ్యక్తులు ప్రాణాలు కోల్పోయారు. ఈ ఘటనకు బాధ్యుడిగా ఆరోపణలు ఎదుర్కొంటున్న పొరుగున ఉండే రిషభ్ శుక్లాను పోలీసులు అరెస్ట్ చేశారు. దాదాపు 30 ఏళ్ల వయస్సు ఉన్న రిషభ్ శుక్లా, మర్చంట్ నేవీలో నావిగేషన్ ఆఫీసర్‌గా పనిచేసి, ఆ తర్వాత ఉద్యోగం నుండి తొలగించబడినట్లు సమాచారం.

రిషభ్ శుక్లాకు, తివారీ కుటుంబానికి మధ్య గతంలోనే వివాదాలు ఉన్నాయని స్థానికులు తెలిపారు. ముఖ్యంగా, మర్రిచెట్టు కింద వేదిక (అరుగు) నిర్మాణం విషయంలో రెండు కుటుంబాల మధ్య విభేదాలు వచ్చాయి. సుమారు నెలన్నర క్రితం ఈ సమస్య పోలీస్ స్టేషన్ వరకు కూడా వెళ్ళినట్లు తెలుస్తోంది. ఆ సమయంలో నిర్మాణ పనులను నిలిపివేశారు. అయినప్పటికీ, రెండు కుటుంబాల మధ్య ఉద్రిక్తత పూర్తిగా తగ్గలేదు. ఈ క్రమంలో, ఘటన జరిగిన రోజు ఉదయం శివేంద్ర తివారీ గుడికి వెళ్లి తిరిగి వస్తుండగా, కార్ పార్కింగ్ విషయమై రిషభ్ శుక్లాతో గొడవ జరిగింది.

మాటమాట పెరగడంతో మొదట శివేంద్ర తివారీపై రిషభ్ తుపాకీతో కాల్పులు జరిపాడు. తుపాకీ శబ్దం విని బయటకు వచ్చిన ఆయన సోదరుడు శివాజీ తివారీపై కూడా అతడు కాల్పులు జరిపాడని పోలీసులు తెలిపారు. ఆ తర్వాత బయటకు వచ్చిన శివాజీ కుమారుడు సుయష్ తివారీ కూడా తుపాకీ గుళ్లకు బలయ్యాడు. ఇందులో శివాజీ తివారీ, సుయష్ అక్కడికక్కడే మృతి చెందారు. తీవ్రంగా గాయపడిన శివేంద్ర తివారీ ఆసుపత్రిలో చికిత్స పొందుతూ కన్నుమూశారు. ఈ ఘటనను ప్రత్యక్షంగా చూసిన ఒక పొరుగు వ్యక్తి, ఎనిమిది నుండి పది సార్లు తుపాకీ పేలిన శబ్దం వినిపించిందని చెప్పాడు. శివాజీ తివారీ విద్యుత్ శాఖలో పనిచేసి పదవీ విరమణ పొందినవారని, శివేంద్ర తివారీ లక్నో యూనివర్సిటీలో పనిచేస్తున్నారని, సుయష్ ఎలక్ట్రికల్ వస్తువుల వ్యాపారం చేస్తున్నారని సమాచారం.

ఈ ఘటనలో మరణించిన సుయష్ తివారీకి రాబోయే డిసెంబర్ 5వ తేదీన వివాహం నిశ్చయమైంది. దీనికి సంబంధించిన ఏర్పాట్లు ఇంట్లో జరుగుతుండగా, ఘటనకు ముందు రోజే పెళ్లికి సంబంధించిన ప్రత్యేక పూజలు నిర్వహించినట్లు తెలుస్తోంది. బంధువులతో సంతోషంగా ఉన్న ఆ కుటుంబంలో, మరుసటి రోజే ముగ్గురు ప్రాణాలు కోల్పోవడంతో తీవ్ర విషాదం అలముకుంది. కాగా, పోలీసులు రిషభ్ శుక్లాను అరెస్ట్ చేసి, నేరానికి ఉపయోగించిన తుపాకీని, నాలుగు ఖాళీ కేట్రిడ్జ్‌లను స్వాధీనం చేసుకున్నారు. రిషభ్ తన తండ్రితో కలిసి నివసిస్తున్నాడని, ఆయన తల్లి గతంలోనే మరణించిందని సమాచారం. నిందితుడిపై కఠిన చర్యలు తీసుకోవాలని, అతని ఇంటిని కూల్చివేయాలని బాధితుల కుటుంబ సభ్యులు డిమాండ్ చేస్తున్నారు. ఈ హత్యలపై పోలీసులు తదుపరి విచారణ జరుపుతున్నారు.