అమెరికాలోని ఫ్లోరిడా రాష్ట్రంలో ఉన్న ‘సినేపోలిస్ లగ్జరీ’ థియేటర్కు తన స్నేహితులతో కలిసి సినిమా చూడటానికి వెళ్లిన 24 ఏళ్ల యువతి ఆసుపత్రిలో చేరాల్సిన పరిస్థితి కలగడం తీవ్ర దిగ్భ్రాంతిని కలిగించింది.
సినిమాలోని ఒక నిర్దిష్ట సన్నివేశాన్ని చూసి ఆ యువతి, ఆమె స్నేహితులు బిగ్గరగా నవ్వారు. దీనితో ఆగ్రహించిన పక్కన కూర్చున్న ఒక వ్యక్తి, వారిపై బూతులు తిడుతూ గొడవకు దిగాడు.
వాదన ముదరడంతో, ఆ వ్యక్తి ఆ యువతుల తిండిని కింద పడేస్తానని బెదిరించాడు. “చేతనైతే పడేయ్” అని ఆ యువతి ధైర్యంగా అనడంతో, ఆగ్రహంతో ఊగిపోయిన ఆ వ్యక్తి తిండిని కింద పడేయడమే కాకుండా, చేతిలో ఉన్న పిజ్జా ప్లేట్ను తీసుకుని ఆ యువతి ముఖంపై గట్టిగా కొట్టాడు. దీనితో ఆ యువతి వేలు విరగడమే కాకుండా, ముఖంపై గాయం, కంటికి తీవ్ర గాయం కావడంతో ఆసుపత్రిలో చికిత్స పొందాల్సి వచ్చింది.
దాడి చేసిన తర్వాత, ఏమీ జరగనట్లు ఆ వ్యక్తి మళ్లీ తన సీట్ వద్దకు వెళ్లి కూర్చుని, “చీర్స్” అని చెప్పాడని బాధితురాలు ఆవేదనతో తెలిపింది. వెంటనే ఆ యువతులు థియేటర్ సెక్యూరిటీ సిబ్బందికి సమాచారం అందించారు. అయినప్పటికీ, పోలీసులు ఘటనా స్థలానికి చేరుకునేలోపే ఆ వ్యక్తి అక్కడి నుండి తప్పించుకోవడానికి అనుమతించబడ్డాడని సమాచారం.
ఈ దాడి ఘటన మొత్తాన్ని ఆ యువతి స్నేహితురాలు తన సెల్ఫోన్లో వీడియోగా రికార్డు చేసింది. ప్రస్తుతం ఆ వీడియో ఆధారంగా, తప్పించుకున్న వ్యక్తి కోసం మైయామి నగర పోలీసులు తీవ్రంగా గాలిస్తున్నారు. సినిమా చూసే సమయంలో జరిగిన ఈ హింసాత్మక ఘటన అంతర్జాతీయ స్థాయిలో తీవ్ర సంచలనం సృష్టించింది.