“సినిమా స్టైల్‌లో ఛేజింగ్!” – టైరు పేలినా రిమ్‌‌పైనే పరుగెత్తిన స్కార్పియో.. వెంబడించి పట్టుకున్న పోలీసులు..!!!

అసోం రాష్ట్రంలో ప్రమాదం చేసి పారిపోతున్న ఓ నలుపు రంగు స్కార్పియో కారును, పోలీసులతో పాటు స్థానిక ప్రజలు పలు కిలోమీటర్ల మేర వెంబడించి పట్టుకున్న సినిమా తరహా ఛేజింగ్ ఘటన తీవ్ర కలకలం రేపింది.

అసోం రాష్ట్రం కర్బీ అంగ్లాంగ్ (Karbi Anglong) జిల్లాలో అతివేగంగా దూసుకొచ్చిన ఓ నలుపు రంగు స్కార్పియో కారు, ప్రమాదవశాత్తు ఓ బాలుడిని ఢీకొట్టి తీవ్రంగా గాయపరిచింది. ప్రమాదం జరిగిన వెంటనే కారును ఆపకుండా, డ్రైవర్ అత్యంత వేగంగా కారును నడుపుకుంటూ అక్కడినుంచి పారిపోయాడు. ఇది చూసి షాక్‌కు గురైన స్థానిక ప్రజలు, పోలీసులు వెంటనే తమ వాహనాల్లో ఆ స్కార్పియో కారును వెంబడించడం ప్రారంభించారు.

జాతీయ రహదారిపై జరిగిన ఈ హై-స్పీడ్ ఛేజింగ్ సమయంలో, కారు టైరు ఒకటి పూర్తిగా పేలిపోయింది. అయినా కూడా డ్రైవర్ కారును ఆపకుండా, టైరు లేని మెటల్ రిమ్‌పైనే కారును అత్యంత వేగంగా పలు కిలోమీటర్ల మేర అలాగే నడిపాడు. తప్పించుకునే క్రమంలో రోడ్డుపై వెళ్తున్న అనేక ఇతర వాహనాలను కూడా ఆ స్కార్పియో ఢీకొట్టింది. చివరగా నాగావ్ (Nagaon) జిల్లాకు చేరుకునే సరికి, పోలీసులు మరియు ప్రజలు ఆ కారును నలువైపుల నుంచి చుట్టుముట్టి, అడ్డగించి పట్టుకున్నారు.