పశ్చిమ బెంగాల్లోని ఉత్తర 24 పరగణాల జిల్లాలో బుధవారం అర్థరాత్రి జరిగిన నాటు బాంబు దాడిలో ఐదుగురు బీజేపీ కార్యకర్తలు గాయపడ్డారు. బీజేపీ నేత సువేందు అధికారికి అత్యంత సన్నిహితుడైన వ్యక్తి హత్యకు గురై రాష్ట్రంలో రాజకీయ ఉద్రిక్తతలు రేకెత్తిన కొద్ది గంటలకే ఈ ఘటన జరిగిందని పోలీసులు తెలిపారు.
పానిహటిలోని సెయింట్ జేవియర్స్ ఇన్స్టిట్యూషన్ సమీపంలో ఈ ఘటన జరిగింది. గుర్తు తెలియని దుండగులు బీజేపీ కార్యకర్తల బృందంపై నాటు బాంబులు విసిరి అక్కడి నుండి పరారయ్యారు. స్థానిక వర్గాల సమాచారం ప్రకారం.. పానిహటిలోని 2వ వార్డు దత్తా రోడ్డులో బీజేపీ కార్యకర్తలు నివాసితులతో మాట్లాడుతుండగా, మోటార్ సైకిళ్లపై వచ్చిన కొందరు వ్యక్తులు వారిపై బాంబులతో దాడి చేశారు. గాయపడిన వారిని కోల్కతాలోని ఆర్.జి. కర్ మెడికల్ కాలేజీ అండ్ హాస్పిటల్లో చేర్చినట్లు పోలీసులు పేర్కొన్నారు.
సువేందు అధికారి సన్నిహితుడు చంద్రనాథ్ రథ్ను మోటార్ సైకిల్పై వచ్చిన దుండగులు కాల్చి చంపిన కొద్ది గంటలకే ఈ దాడి జరిగింది. అధికార తృణమూల్ కాంగ్రెస్ (TMC) ప్రతీకార హింసకు పాల్పడుతోందని బీజేపీ ఆరోపించింది. పానిహటి దాడి వెనుక టీఎంసీ హస్తం ఉందని బీజేపీ ఆరోపించగా, మమతా బెనర్జీ నేతృత్వంలోని టీఎంసీ ఈ ఆరోపణలను ఖండించింది.
ఒక సీనియర్ పోలీసు అధికారి మాట్లాడుతూ, “మేము దర్యాప్తు ప్రారంభించాము. నిందితులను గుర్తించడానికి పరిసర ప్రాంతాల్లోని సీసీటీవీ ఫుటేజీని పరిశీలిస్తున్నాము. నిందితులను పట్టుకోవడానికి దాడులు నిర్వహిస్తున్నాము” అని తెలిపారు.
ప్రస్తుతం ఆ ప్రాంతంలో భారీగా పోలీసు బలగాలను మోహరించారు. “మేము కఠినమైన నిఘా ఉంచుతున్నాము. ప్రజలు వదంతులను నమ్మవద్దని కోరుతున్నాము. శాంతిని కాపాడటానికి అవసరమైన చర్యలు తీసుకుంటున్నాము” అని అధికారి జోడించారు. ఈ బాంబు దాడి జరిగిన ప్రాంతం, ఆర్.జి. కర్ ఆసుపత్రి బాధితురాలి తల్లి మరియు కొత్తగా ఎన్నికైన బీజేపీ ఎమ్మెల్యే రత్న దేబ్నాథ్ నివాసానికి సమీపంలో ఉండటం గమనార్హం.