ముంబై: భారత టీ20 క్రికెట్లో పెను మార్పులు చోటుచేసుకోనున్నాయా? కొద్ది వారాల క్రితమే తన సారథ్యంలో భారత జట్టుకు టీ20 ప్రపంచకప్ (2026) అందించిన సూర్యకుమార్ యాదవ్, ఇప్పుడు తన కెప్టెన్సీని కోల్పోయే ప్రమాదంలో ఉన్నారా? అంటే బీసీసీఐ వర్గాల నుంచి వస్తున్న సమాచారం ప్రకారం ‘అవును’ అనే సమాధానమే వినిపిస్తోంది. గత రెండేళ్లుగా పొట్టి ఫార్మాట్లో టీమ్ ఇండియాను అద్భుతంగా నడిపిస్తున్న ఈ 35 ఏళ్ల డాషింగ్ బ్యాటర్కు గడ్డుకాలం మొదలైనట్లు కనిపిస్తోంది.
బ్యాటింగ్ వైఫల్యమే శాపమా?
భారత్ ప్రపంచకప్ గెలిచినప్పటికీ, వ్యక్తిగతంగా సూర్యకుమార్ బ్యాటింగ్లో ఆశించిన స్థాయిలో రాణించలేకపోయారు. మెగా టోర్నీలో మొత్తం 230 పరుగులు చేసిన సూర్య, అమెరికాపై చేసిన 84 పరుగుల ఇన్నింగ్స్ మినహాయిస్తే, మిగిలిన మ్యాచ్ల్లో ప్రభావం చూపలేకపోయారు. 2028 లాస్ ఏంజిల్స్ ఒలింపిక్స్ను లక్ష్యంగా పెట్టుకున్నామని సూర్య ప్రకటించినప్పటికీ, బోర్డు మాత్రం మరోలా ఆలోచిస్తోంది.
“కేవలం కెప్టెన్సీ కార్డుతో జట్టులో చోటు నిలబెట్టుకోవడం సాధ్యం కాదు. ఇంగ్లాండ్ పర్యటన వరకు సూర్య సారథిగా కొనసాగవచ్చు, కానీ ఆ తర్వాత మార్పు తప్పకపోవచ్చు. 2028 ఒలింపిక్స్ను దృష్టిలో ఉంచుకుని యువ రక్తాన్ని ప్రోత్సహించాల్సిన అవసరం ఉంది” అని బోర్డు ప్రతినిధి ఒకరు పేర్కొన్నట్లు తెలుస్తోంది.
వరుసలో కుర్రాళ్లు.. 15 ఏళ్ల వండర్ కిడ్ ఎంట్రీ?
మరోవైపు ఐపీఎల్ ద్వారా ఎంతోమంది యువ ఆటగాళ్లు వెలుగులోకి వస్తున్నారు. ముఖ్యంగా 15 ఏళ్ల సంచలనం వైభవ్ సూర్యవంశీని సీనియర్ జట్టులోకి తీసుకోవాలని డిమాండ్ పెరుగుతోంది. త్వరలో జరగబోయే ఐర్లాండ్ సిరీస్లో ఈ వండర్ కిడ్ను పరీక్షించాలని బీసీసీఐ భావిస్తోంది. ఇలాంటి పరిస్థితుల్లో సూర్యకుమార్ తన ఫామ్ను నిలబెట్టుకోలేకపోతే, కెప్టెన్సీ మాత్రమే కాదు.. జట్టులో స్థానం కూడా గాలిలో దీపమే అని విశ్లేషకులు హెచ్చరిస్తున్నారు.
ప్రపంచ విజేతగా నిలిచిన కొన్ని రోజుల్లోనే సూర్య భవితవ్యంపై ఇలాంటి నీలినీడలు కమ్ముకోవడం ఇప్పుడు క్రికెట్ వర్గాల్లో హాట్ టాపిక్గా మారింది.